Pandemııa kezindegi júkti áıelderdiń kútimi: Almatyda Frantsııanyń jetekshi dárigerleri vebınar ótkizdi
ALMATY. QazAQparat - Almaty ákimdigi Frantsııanyń jetekshi dárigerleriniń qatysýymen júkti áıelder men bosanatyn áıelderdiń densaýlyǵyn qorǵaý boıynsha vebınar ótkizdi, dep habarlaıdy QazAqparat tilshisi.
Almaty qalasy ákimdiginiń bastamasymen jáne QR Frantsııadaǵy Elshiliginiń jáne Frantsııanyń QR Elshiliginiń qoldaýymen, analar men balalardyń densaýlyǵyn qorǵaýǵa, negizinen COVID-19 áseri, reanımatsııalyq sharalardy basqarý tetikteri, sondaı-aq neonataldy kútý erejelerine (týǵannan 28 kúnge deıingi kezeń) arnalǵan onlaın vebınar ótti.
Vebınarǵa Almaty men Parıjdegi jetekshi aýrýhanalardyń akýsher-gınekologtary, neonatologtary, anestezıolog-reanımatologtary qatysty.
Perınataldyq kútim salasyndaǵy Frantsııanyń jetekshi sheteldik mamandary COVID-19 kezinde júkti áıelder men jańa týǵan nárestelerdi perınataldy kútý tájirıbelerimen bólisti.
Almaty qalasy ákiminiń orynbasary Erjan Babaqumarov óziniń sózinde Frantsııanyń Qazaqstandaǵy elshisi Dıde Kanesske jáne frantsýz densaýlyq saqtaý uıymy men Assistance Publique-Hôpitaux de Paris (AP-HP) ýnıversıtetiniń aýrýhana ortalyǵy aýrýhanasy dırektorynyń halyqaralyq qatynastar jónindegi orynbasary Alen Berdege birlesken is-sharalar men vebınar uıymdastyrýda qoldaý kórsetkeni úshin alǵys bildirdi.
Búginde Almaty úshin júkti áıelder men jańa týǵan nárestelerdi kútý, ásirese pandemııa kezinde óte mańyzdy.
Almatyda osy baǵytta ana men sábı óliminiń aldyn alý boıynsha keshendi jospar júzege asyrylýda. Júkti, bosanǵan áıelderge ýaqtyly bilikti kómek kórsetý úshin mobıldi toptar quryldy jáne jumys isteıdi; AMSK deńgeıinde qalanyń kópsalaly toby deńgeıinde qaýip tobyndaǵy júkti áıelder boıynsha konsılıýmdar ótkiziledi.
Port Royal – AP-HP perınataldyq ortalyǵynyń akýsher-gınekology Olıvııa Anselem koronavırýs ınfektsııasyn juqtyrǵannan keıin ár túrli jastaǵy júkti áıelder arasynda júrgizilgen zertteýdiń aldyn ala nátıjelerimen tanystyrdy.
Vırýs juqtyrǵan júkti áıelderde asqynýlar preeklampsııa ákelýi múmkin (bul júktiliktiń 20 aptasynan keıin damıtyn jáne joǵary qan qysymymen (140 jáne / nemese 90 mm rt.st.-den joǵary), proteınýrııamen jáne jıi isinýmen sıpattalatyn júktiliktiń asqynýy).
Sonymen birge ınfektsııanyń anadan balaǵa juǵý jaǵdaılary týǵanǵa deıin de, bosanǵannan keıin de tirkelgen.
Sonymen qatar, reanımatsııalyq sharalardy basqarý jáne neonataldy kómek kórsetý máseleleri qarastyryldy. Doktor Elı Hadj Port Roıal jáne professor Valerı Bıran júkti nemese bosanatyn áıeldegi bar aýrýlardy eskere otyryp, emdeýdiń núkteli ádisin atap ótti.
Vebınardyń sońynda qatysýshylar júkti áıelderdiń qaýip tobyna jatatyndyǵyn jáne osy sanattaǵylar, profılaktıkalyq sharalardy kúsheıtýdiń, qajet bolsa psıhologııalyq kómek kórsetýdiń mańyzyn atap ótti.
Júkti áıelderdiń densaýlyǵyn saqtaý úshin qaýipsiz orta qajet. Sondyqtan vırýstyń aýa-tamshy jolymen juǵýynyń aldyn alý úshin júkti áıelderdiń týystary men dostaryna, sondaı-aq barlyq almatylyqtarǵa vaktsınalaný máselesin keıinge qaldyrmaý usynyldy.
Almaty qalalyq Qoǵamdyq densaýlyq basqarmasynyń basshysy Narıman Tabynbaev atap ótkendeı, vaktsınalaýmen megapolıs turǵyndarynyń 44%-y qamtylǵan.
