Pandemııa kezindegi ómir: DSM tegin onlaın kýrs ótkizbek

NUR-SULTAN. QazAqparat – Jumys formatynyń kúrt ózgerýi, fırmalardyń bıznes-modelderin kútpegen jerden qaıta qurýy uıymdarmen birge jekelegen qyzmetkerlerdi de eseńgiretip tastaǵany jasyryn emes. Oqshaýlaný men jalǵan aqparat jeldeı esken qazirgi jaǵdaıda kıberqaýipsizdik biliktiligi erekshe mańyzǵa ıe. Osy sebepti QR Densaýlyq saqtaý mınıstrliginiń Tsıfrlandyrý keńsesi tsıfrlyq saýattylyq deńgeıin tegin arttyrýdy usynady, dep habarlaıdy QazAqparat.⠀

«Nıet bildirýshilerge «Pandemııa kezindegi ómir men kásip qaýipsizdigi» atty tegin onlaın kýrstan ótý usynylady. Kýrs osynaý qıyn sátte qazaqstandyq uıymdar men el azamattaryn barynsha qoldaýǵa baǵyttalǵan. Sondaı-aq tsıfrlyq álemde ózin senimdi sezinýge, indet týraly qajetti daǵdylar men bilim alýǵa múmkindik beredi. Kýrsty oqytýdyń beıimdelý júıesi negizinde jasalǵan. Ol ómirlik mysaldarmen bekitilgen teorııalyq materıaldardan, birneshe jaýap nusqalarynan jáne senimdilik dárejesin anyqtaıtyn testterden qurastyrylǵan», - dep habarlaıdy Densaýlyq saqtaý mınıstrliginen.

Sabaq árdaıym suraqtan bastalady. Sodan soń paıdalanýshynyń taqyrypty túsinýine negizdele otyryp, júıe teorııalyq materıaldy kórsetedi. Bolmasa jaýaptar durys bolǵan jaǵdaıda basqa taqyrypqa aýysady. Test qorytyndysy boıynsha adaptıvti tehnologııa materıaldy bekitip, qaıtalaýdy usynady. Bul rette aqyldy júıe paıdalanýshyǵa qıynǵa soqqan taqyryptarǵa ǵana toqtalatynyn atap ótý kerek

«Pandemııa kezindegi ómir men kásip qaýipsizdigi» tegin kýrsyn «Kasperskıı zerthanasy» oqytýdyń adaptıvti salasyndaǵy úzdik kompanııalardyń biri Area9 Lyceum-men birlese ázirlegen. Kýrstan siltemesin basyp, tirkelý arqyly ótýge bolady. Ol koronavırýstyń qaýip deńgeıin, aýyryp qalý nemese aınalańdaǵylarǵa juqtyrý qaýpin azaıtý úshin ózińdi qalaı ustaý kerektigin bilýge kómektesedi. Sondaı-aq sabaq aýrýdyń aldyn alý ádisteri men koronavırýstyq ınfektsııalar tobymen baılanysty stereotıpter týraly aqparattardy qamtıdy. Modýl medıtsına jáne bıologııa salasyndaǵy jetekshi mamandardyń qatysýymen ázirlengen. Avtory Verona ýnıversıtetiniń medıtsına ǵylymdarynyń doktory, klınıkalyq bıohımııa professory Djýzeppe Lıppı. Modýldiń retsenzentteri — doktor Nıl Anderson, Bleık Bıýken, Pıng Vang», - dep habarlaıdy mınıstrlikten.⠀

Ekinshi modýl qashyqtaǵy jumysqa qaýipsiz beıimdelýge jáne keńsedegi júıelik ákimshiniń kómeginsiz kıbersaýattylyqty arttyrýǵa kómektesedi. Sabaq qorytyndysy boıynsha tsıfrlyq saýattylyǵy tómen, tipti buryn qashyqtan múldem jumys istemegen paıdalanýshylar ózine úıden barynsha qaýipsiz jumysty uıymdastyra alatyndaı etip qurastyrylǵan. Modýl kıberqaýipsizdiktegi eń mańyzdy bazalyq daǵdylardy damytýǵa kómektesedi. Qazaqstandyqtar úshin qashyqtyqtan qaýipsiz jumys isteý týraly qosymsha aqparatty myna siltemeden tabýǵa bolady.