Pandemııa kezindegi 42 500 teńge aıasyndaǵy daý-damaıdyń sebebi anyqtaldy

NUR-SULTAN. QazAqparat – Ótken jyly elimizde pandemııa etek jaıǵanda halyq jumyssyz qalyp, memleket tarapynan ýaqytsha qarjylyq qoldaýdyń kórsetilgeni aıan. Aıta ketsek, 42 500 teńge aıasynda kóptegen suraqtar men kúdiktiń týyndaǵany ras. Araǵa biraz ýaqyt salyp atalǵan máselege qatysty túsinikteme berildi, dep habarlaıdy QazAqparat tilshisi.

«Ótken jyly bastalǵan pandemııa bizge neni kórsetti? Ol tsıfrlandyrýdyń mańyzdylyǵyn kórsetip otyr. Mysalǵa aıtar bolsam, ótken jyly elimizde 42 500 teńgeniń halyqqa qalaı berilgenin bilesizder. Daý-damaı týdy, shýlattyq, halyqtyń qınalǵany ras. Qalaı istedik, biz aldymen halyqtan ótinish qabyldadyq, oǵan bizdiń EGOV tótep bere almaı basqa portal ashtyq. Ótinish qabyldanǵan soń, kimge berý nemese bermeý kerek ekenin anyqtaý úshin 1 aı ýaqyt joǵaltyp aldyq. Al negizinde tsıfrlyq túrde ony 1 kúnniń ishinde anyqtaýǵa bolar edi. Osy oraıda atalǵan qatelikti qaıtalamaý úshin biz búginde memlekettik qyzmetti bir alańda ıaǵnı bir platforma arqyly kórsetý kerek degen oıǵa kelip otyrmyz»,- dedi QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Ashyq alań» telebaǵdarlamasynda.

Buǵan deıin mınıstr EGOV memlekettik qyzmet aınalasyndaǵy qaýesetke qatysty túsinikteme bergen edi.