Pandemııa kezinde turǵyndardyń taýǵa barýy tórt esege artty — Baqytjan Saǵyntaev

ALMATY. QazAqparat - Baqytjan Saǵyntaev «Almatyny damytý — 2021: kóriktendirý jáne kógaldandyrý jobalary» onlaın tanystyrylymy barysynda Almaty ortalyǵynyń tarıhı kelbetin saqtaý jáne týrıstik ınfraqurylymdy damytý úshin qandaı jumystar júrgizilip jatqanyn aıtty, dep habarlaıdy QazAqparat tilshisi.

Qalanyń qurylys saıasatynyń mańyzdy bóligi - ortalyqtyń tarıhı kelbetin saqtaý. Bul óz kezeginde týrısterdi qyzyqtyrýǵa áser etedi. Tarıhı ortalyqta ǵımarattardyń qasbetterin jóndeý men qalpyna keltirý boıynsha keshendi jumys aıasynda 156-dan astam úıdiń qasbeti qaıta qalpyna keltirildi. 2021 jyly 70 qasbetti jóndeý josparda.

«Pandemııa kezinde turǵyndardyń taýǵa barýy da tórt esege artqandyqtan, azamattarǵa qoljetimdi bolýy úshin týrıstik qoǵamdyq keńistikter qurý jumystary júrgizilýde. Ótken jyly taýly jerlerde 4 vızıt-ortalyq salyndy, 1000 shaqyrym jaıaý júrginshi joly tsıfrlandyryldy, 500 shaqyrym jol abattandyryldy. Bıyl qosymsha 172 shaqyrym taý baǵyttary abattandyrylady»,-dedi Baqytjan Saǵyntaev.

Taýly jerlerde qaýipsizdikti qamtamasyz etý boıynsha ózge de jobalar pysyqtalyp jatyr. Bıyl taýda týrıster baǵyttan jıi adasyp, uıaly baılanys nashar ustaıtyn 14 qaýipti aımaq jabyldy. Sondaı-aq taýda qutqarýshylar pýltine apat sıgnaldaryn berý úshin qosymsha 10 radıojúıelik qurylǵy ornatylady.