Pandemııa kezinde senimdi aqparat izdegen aýdıtorııa telearnalarǵa oraldy - Lázzat Tanysbaı
«Pandemııa kezindegi telearnalar taqyrybyna toqtalatyn bolsaq, bizde de barlyq saladaǵydaı ózgerister óte kóp. «Qazaqstan» korporatsııasynyń quramynda birneshe respýblıkalyq telearna, radıostantsııalar jáne aımaqtyq telearnalar bar. Barlyǵyna toqtalý múmkin emes. Dese de, karantın engizgen negizgi ózgerister jóninde aıtyp ótsem. Shyny kerek, menedjer retinde dál osy sátte eki úlken mindet-mıssııanyń arasynda qaldyq. Birinshisi jáne eń bastysy - qyzmetkerlerimizdiń qaýipsizdigin saqtaý. Bilesizder, ujym óte úlken, sondyqtan da aldymen múmkin bolǵan redaktsııalardyń jumysyn qashyqtyqqa aýystyryp, keıbir bólim qyzmetkerlerdi aýysymdarǵa bóldik. Jýrnalıst, rejısser, redaktorlarymyz habarlaryn tutastaı bolmasa da, onlaında jasaýǵa daǵdylandy», - dedi Lázzat Tanysbaı.
Degenmen ol munyń barlyq qyzmetterge qatysty emestigin basa aıtty.
«Sebebi – aldymyzda kórermendi naqty, tekserilgen aqparatpen qamtamasyz etý jáne teleefırdi sapaly kontentpen toltyrý mindeti turdy. Kerisinshe, karantın kezinde dáleldi, shynaıy, shuǵyl aqparatqa degen suranys kúsheıdi. Sondyqtan da elde karantın bolǵan kezde televızııa mindeti men ondaǵy mamandardyń qyzmeti eselep artty. Mysaly «Qazaqstan» arnasy bir ǵana kovıd taqyrybynda 200 rolık jasap efırge berdi. Sol kezde qolǵa alynǵan kúnsaıynǵy tikeleı efırdegi «Teledáriger» jobasyna bir habardyń ishinde eki myńǵa deıin suraq kelip túsip otyrǵan kúnder boldy. Dál karantın kúnderi jańalyqtar shyǵarylymdary buryn-sońdy bolmaǵan qaralymdardy kórsetti», - dedi ol.
Korporatsııa tóraıymynyń aıtýynsha, Qazaqstandaǵy jalpy televızııa kórý 22 paıyzǵa ósken. Munyń ishinde korporatsııa arnalarynyń da úlesi salmaqty.
«Bir sózben aıtsaq, pandemııa kezinde senimdi aqparat kózin izdegen aýdıtorııa telearnalarǵa oraldy», - dedi Lázzat Tanysbaı.
