Pandemııa kezinde memlekettik satyp alý protsesin ońtaılandyrý qurylys salasyndaǵy tıimdi sheshim – maman

NUR-SULTAN. QazAqparat – Qazaqstan qurylysshylar odaǵy tóraǵasynyń orynbasary Serikjan Mergenbaev eldegi tótenshe jaǵdaı kezinde Úkimet tarapynan qurylys salasy boıynsha qabyldanǵan sharalarǵa qatysty óz pikirimen bólisti, dep habarlaıdy QazAqparat tilshisi.

«Keńeıtilgen otyrysta kóterilgen máselelermen ony sheshýdegi Memleket basshysynyń usynystary ornyqty dep oılaımyn. Iá, Prezıdent biraz bılik basyndaǵylarǵa eskertý jasap, jumystaryna syn aıtty. Jáne problemalardy sheshý úshin Úkimetke 2 apta ýaqyt bergeni de ádil sheshim dep oılaımyn. Sebebi Prezıdent pandemııamen kúreske tıisti qarajattyń ýaqytyly bólinip, degenmen quzyrly mekemelerdiń der kezinde naqty sharalar qabyldamaǵandyǵyn basa aıtty. Ol qatelik búginde tótenshe jaǵdaıdyń ekinshi kezeńine alyp kelip, qaıta karantın júıesin ornatýǵa ákelip otyr. Al bıznes ókilderi óz tarapynan halyq aldyndaǵy áleýmettik jaýapkershilikti sezinip, jumysshylardy qysqartpaı, jalaqysyn tólep qoldan kelgenshe jaǵdaı jasap otyr. Degenmen bylaı úzdiksiz jalǵasa berýi múmkin emes, bıznesti odan ári damytý úshin paıda, túsim bolý kerek», - dep óz oıymen bólisti S. Mergenbaev.

Onyń aıtýynsha, Memleket basshysynyń bıznes ıelerin ýaqytsha salyqtan bosatý sátti ıdeıa jáne osy sala ókilderi úshin aıtarlyqtaı qoldaý boldy.

«Óz salam boıynsha aıtar bolsam. Qurylys salasynda memlekettik satyp alý týraly zań jobasyna ózgerister engizildi. Sonyń negizinde buryn memlekettik satyp alý protsesi 2-3 aıǵa sozylatyn bolsa, qazir nebári 7 kúnniń ishinde sheshim shyǵady. Pandemııa kezinde memlekettik satyp alý protsesiniń ońtaılandyrylýy qurylys salasyndaǵy tıimdi sheshim bolyp otyr. Jáne árbir qurylys kompanııasy óz shama-sharqyna qarap qurylys nysandaryn salýǵa ótinim beredi. Bul jerdegi bir aıtyp ótetin másele atalǵan zańnamalyq ózgeris osy jyldyń tamyz aıyna deıin ǵana jaramdy. Osy oraıda bizdiń odaq Memleket basshysyna jyldyń sońyna deıin sozý týraly úndeý joldadyq. Prezıdentke úndeý joldamas buryn elimizdiń barlyq óńirlerindegi qurylysshylar arasynda saýalnama júrgizip olardyń pikirin bildik, nátıjesinde qurylys salasyndaǵy memlekettik satyp protsesine engizilgen jańa tártipti jyldyń sońyna deıin uzartý týraly ótinish bildirýge bir aýyzdan kelistik. Úndeýimiz óz nátıjesin beredi dep úmittenemiz», - dedi ol.

Aıta ketsek, keshe QR Prezıdenti Qasym-Jomart Toqaevtyń qatysýymen Úkimettiń keńeıtilgen otyrysy ótti.