Pandemııa kezinde qolma-qol aqshany paıdalanýǵa bola ma: Ulttyq bank jaýaby
NUR-SULTAN. QazAqparat – COVID-19 vırýsynyń pandemııasyna baılanysty esep aıyrysý kezinde qolma-qol aqshany paıdalanýǵa bola ma? Bul suraqqa QR Ulttyq bankinen jaýap berdi, dep habarlaıdy QazAqparat.
Ulttyq bankten málim etkendeı, COVID-19 vırýsynyń taralý yqtımaldyǵyna qatysty túsinikteme berý bank quzyretine jatpaıdy.
«Áıtse de qolma-qol aqshany paıdalanýǵa baılanysty qaýip – esiktiń tutqasyn, nesıe kartasyn nemese mobıldi telefondy ustap, paıdalaný qaýpinen joǵary emestigine nazar aýdartamyz. Biz qolymyzben kúndelikti ustaıtyn qanshama zat bar. COVID-19 vırýsy juqqan banknottyń aınalymǵa túsý yqtımaldyǵy tómen. Eń birinshi kezekte banknot uzaq ýaqyt boıy ınkassatsııada saqtalady. Ulttyq banktiń ishki normatıvine sáıkes, ekinshi deńgeıli bankterden túsetin qolma-qol aqsha qaıta eseptelgenge deıin 45 kún boıy, al eseptelgennen keıin 1 jylǵa deıin ashylmaı jatýy múmkin», - deıdi Ulttyq banktiń qolma-qol aqsha aınalymy departamentiniń dırektory Jomart Qajymuratov.
Onyń aıtýynsha, Dúnıejúzilik densaýlyq saqtaý uıymynyń aqparatyna sáıkes, qazirgi tańda «vırýstyń zat betinde turaqty saqtalýy týraly málimet joq». Koronavırýstyń ómirsheńdigi birneshe faktorǵa, atap aıtqanda salystyrmaly temperatýra men ylǵaldylyqqa, sonymen birge zattyń betki materıalyna baılanysty bolady.
«Qolma-qol aqshamen jumys isteıtin kassalyq jumysshylardyń jumysyn eskere otyryp, dál osy sanattaǵy azamattarǵa qoldy jıi jýýǵa keńes beriledi. Olar DDU men QR Densaýlyq saqtaý mınıstrligi bergen keńesterdi saqtaýy kerek. Baılanyssyz tólem joldary arqyly vırýstyń taralý yqtımaldyǵy tómen. Dúkender men dárihanalarda, onlaın saýdada qolma-qol aqshasyz tólemmen esep aıyrysýǵa keńes beremiz. Bul baılanystyń sany men deńgeıin tómendetip, koronavırýstyń taralýyna jol bermeıdi», - deıdi Jomart Qajymuratov.
