Pandemııa kezinde astanalyqtarǵa qandaı kómek kórsetildi

NUR-SULTAN. QazAqparat -Nur-Sultan qalasy Jumyspen qamtý jáne áleýmettik qorǵaý basqarmasynyń basshysy Sáýle Nurǵojına pandemııa kezinde elordada qandaı sharalardyń júzege asyrylǵany týraly aıtyp berdi, dep habarlaıdy QazAqparat tilshisi.

«Eldegi pandemııalyq jaǵdaılar jáne karantın engizilýine baılanysty qosymsha sharalar qabyldandy. Elordada 2 AEK kóleminde azyq-túlik jáne turmystyq zattar túrinde 209 myń otbasyǵa 3 ret memlekettik qoldaý kómegi kórsetildi. Sondaı-aq, Memleket basshysynyń bastamasymen qolǵa alynǵan «Bir birgemiz» aktsııasy aıasynda «Nur Otan» partııasy muqtaj jandarǵa 50 myń teńgeden qarjylaı kómek kórsetti», - dedi Sáýle Nurǵojına Nur-Sultan qalalyq máslıhatynyń otyrysynda jasaǵan baıandamasynda.

Onyń aıtýynsha, áleýmettik qoldaýǵa muqtaj jandardyń tizimi quzyrly organdarmen birlesip jasaqtaldy.

«Tótenshe jaǵdaı kezinde tabysynan aıyrylǵan bıznes ókilderi men ózin-ózi qamtamasyz etýshi azamattarǵa áleýmettik qoldaý kórsetý maqsatynda 2 ret 42 500 teńge tólemaqy jasaldy. Jyl basynan beri 663 70 jumys berýshiniń ótinishi qaraldy. Sol sekildi 2020 jyldyń 1 qańtarynan bastap AÁK (ataýly áleýmettik kómek) alýdyń jańa formasy engizildi, elordada AÁK-ti 4062 otbasy nemese 18,6 myń adam alady», - deıdi ol.

Basqarma basshysynyń sózine sensek, ótken jylmen salystyrǵanda bıyl Nur-Sultanda AÁK alatyn otbasy sany 2,5 esege azaıǵan.

Buǵan deıin habarlaǵanymyzdaı, kelesi jyly Nur-Sultan qalasynda barlyq memlekettik qyzmetter elektrondy túrge kóshetin bolady.