Pandemııa kezinde 500-den astam túrkistandyq kásiporynǵa memlekettik qoldaý kórsetilgen
TÚRKІSTAN. QazAqparat – Túrkistan oblysynyń ákimi Ómirzaq Shókeev kásipkerler palatasy Óńirlik keńesiniń jańartylǵan quramymen kezdesti. Jergilikti jas kásipkerler kórmesine qatysqan óńir basshysy jańadan is bastaǵan kásipkerler úshin qolaıly jaǵdaı jasalǵanyn atap ótti, dep habarlaıdy QazAqparat tilshisi.
Aımaq basshysy kásipkerlermen kezdesý barysynda jeńildetilgen qarjylandyrý sheńberinde Túrkistan oblysynda 48 mlrd teńge jumsalyp, pandemııa kezinde 500-den astam kásiporynǵa memlekettik qoldaý kórsetilgenin jetkizdi.
«Búginde bıznestiń de baǵyttary jańarýda. Soǵan sáıkes ózgertýler oryn alý kerek. Ásirese ozyq ta qabiletti jastar ósirý kerek. Jastarǵa bıznespen aınalysýdyń jolyn kórsetken Elbasymyz Nursultan Nazarbaevtyń qoldaýymen, Memleket basshysynyń tapsyrmasymen elimizde kóptegen bıznes jobalar sátti júzege asýda. Biz Túrkistan óńirinde zamanaýı jańa ıdeıalardy, týrızm, óndiris salalaryn jańǵyrtatyn jańa jobalardy tartamyz, qoldaımyz»,-dedi Ómirzaq Shókeev.
Aımaq basshysyn «Bastaý» jobasyna qatysýshylardyń arnaıy kórmesimen tanystyrǵan óńirlik kásipkerler palatasynyń dırektory Tımýr Naqypbekov atqarylǵan jumystyń barysyn baıandap ótti.
Búginde oblysta jumys istep turǵan shaǵyn jáne orta kásipkerlik sýbektileriniń sany búkil álemdi ábigerge salǵan pandemııaǵa qaramastan oń kórsetkishke ıe. Bul ósimde UKP «Bastaý» jobasy túlekteriniń de úlesi az emes.
«Eldegi shekteý sharalaryna qaramastan palata mamandary kásipkerlerge kórsetiletin qyzmetterdi toqtatqan emes. Buryn qyzmetter oflaın kórsetilse, jaǵdaıdy eskere kele onlaın qyzmetterge de basymdyq berildi. Kásipkerler palatasynyń keńesshileri 11 aıda kásipkerlik sýbektilerine 13 711 keńes bergen. Budan bólek, «Bastaý» jobasy aıasynda 3676 túlek oqýdan ótip, onyń 1 500-i 11 60,2 mln tg qarjylandyrylǵan», -dep atap ótti palata basshysy.
Otyrystaóńirlik keńes músheleri oblys basshysyn ónerkásiptik parkter qurý jónindegi jobalarymen tanystyrdy.
Bilim salasyndaǵy jańasha betburystar, biregeı óndiris, ınnovatsııalyq tehnologııalardyń túrlerin damytý jáne Túrkistan oblysynda ulttyq taksı qyzmetin qurý boıynsha erekshe jobalar oblys ákimi tarapynan qoldaý tapty.
Kásipkerlerdiń aıtýynsha, senimdi basqarý bilim mekemesi men óndiris arasyndaǵy qolaıly kópir bolyp tabylady, bul stýdentterdi aýyl sharýashylyǵynyń tynys-tirshiligimen tanystyrýǵa múmkindik bermek.
Óz kezeginde oblys basshysy ákimdik tarapynan kásipkerlerge olardyń jańa jobalaryn júzege asyrýda tıisti qoldaý sharalary kórsetiletinin basa aıtty.
