Pandemııa ǵylymnyń ekonomıkadaǵy rólin burynǵydan da salmaqty ete tústi – Prezıdent keńesshisi
«Meniń oıymsha, daǵdarystyń qansha ýaqytqa sozylatynyn naqty bilemin dep aıtý aqymaqtyq bolar edi. Mysalǵa meniń elim Ulybrıtanııany alaıyq. Rojdestvo, demalystar kezinde vırýs juqtyrǵandar sany turaqtanǵandaı bolǵan. Omıkron paıda bola ketti. Qazir Ulybrıtanııa shekteý sharalaryn qaıta jandandyrýǵa májbúr. Lokdaýndar kúshine enip, maska kııý talap etile bastady. Birneshe apta buryn bulaı bolaryn eshkim kútken joq», - dedi Qazaqstan Prezıdentiniń keńesshisi.
Baǵdarlama tizginshisi odan halyqty vaktsınalaý nátıjeleriniń ekonomıkaǵa qanshalyqty áser etetinin surady.
«Iá, bul jerde kúmán bolmaýy kerek. Bıyl Qazaqstan ekonomıkasy jaqsy ósim kórsetti dep oılaımyn. Óıtkeni vaktsınatsııa jedel júrgizildi. Qazir 8,2 mln adam ekpe aldy. Kóbi vaktsınanyń údetkish, úshinshi dozasyn tez alyp jatyr. Bul eldegi ekonomıkalyq qatynastardyń jyldam qalpyna kelýine kómektesedi. Adamdar jumysty qaıta bastaý, bıznesti ashý úshin ózderin qaýipsiz sezinýi kerek. Bul kez-kelgen salada mańyzdy. Vaktsınatsııa bolashaqta da mańyzdy faktor bolyp qalady. Biz olardy jetildirip, jańa nusqalardy ázirleıtin bolamyz. Búginde ǵylymnyń bıznesti qoldaýdaǵy jáne jumys oryndaryn saqtaýdaǵy róli artty», - dedi Sýma Chakrabartı.
