Pandemııa búkil álem úshin naǵyz synaq boldy - Darıǵa Nazarbaeva
NUR-SULTAN. QazAqparat – Parlament Senatynyń tóraǵasy Darıǵa Nazarbaeva pandemııa saldaryna qatysty pikir bildirdi, dep habarlaıdy QazAqparat tilshisi.
«Kópshilikti alańdatyp júrgen birneshe máselege toqtalǵym kelip otyr.
Pandemııa búkil álem úshin naǵyz synaq boldy. Ol álemdik ekonomıkany eshqashan bolmaǵan kólemde qysqartyp, munaı naryǵynda baǵanyń tómendeýine, kásiporyndar men turǵyndar sharýashylyqtaryn asa qıyn jaǵdaıǵa alyp keldi. Munyń saldary ár adamnyń ómirine uzaq ýaqyt áser etetini anyq. Bul jaǵdaıdy durys baǵalaı bilýimiz kerek. Shyǵyndardy azaıtý qajet bolady. Bizder endi búgingi kúnniń shyndyǵymen jańasha ómir súrip júrmiz», - dedi D. Nazarbaeva Parlament Senatynyń jalpy otyrysynda.
Osy oraıda ol 24 sáýirde Qaýipsizdik Keńesiniń otyrysy ótkenin, onda Elbasy Nursultan Nazarbaev sóz sóılegenin eske saldy.
«27 sáýirde Memleket basshysy Qasym-Jomart Toqaevtyń Málimdemesi jarııalandy. El basshylyǵynyń negizgi paıymy – daǵdarystan keıingi kezeńge, ekonomıkalyq, áleýmettik, qoǵamdyq ómirdi tótenshe jaǵdaı rejıminen shyǵarýǵa daıyndyqty bastaý kerek. Bul barlyq memlekettik organdarmen qatar, bizdiń aldymyzǵa da, qurmetti depýtattar, birqatar mindetter men máselelerdi qoıady», - dedi Senat tóraǵasy.
