Pandemııa aýylǵa kimniń janashyr ekenin kórsetip berdi – Berik Dúısembınov
«Bul másele búgin ǵana kóterilip otyrǵan joq. Aýyl ákimderin saılaý týraly bastamanyń ózine 7-8 jyl bolyp qaldy. Qazirgi aýyl ákimderin saılaýshylar – máslıhattar. Prezıdenttiń berip otyrǵan tapsyrmasy men qoldanystaǵy aýyl ákimderin saılaý júıesiniń arasy jer men kókteı desek bolady. Mysaly, qazir aýyldyń ákimi bolyp kim saılanyp jatyr? Máslıhattyń usynǵany, aýdan ákiminiń aıdaýyna júretin, zeınetaqyǵa shyǵyp qalǵan nemese ómirlik tájirıbesi az azamattar búgin de aýyldardy basqaryp otyr. Al, endi bolashaqta Prezıdenttiń berip otyrǵan tapsyrmasy qandaı? Ol sol aýylda turatyn, óz aýylyn kórkeıtýge múddeli, jany ashıtyn azamattar aýyldarǵa saılanýy kerek», - dedi Berik Dúısembınov búgin OKQ-da ótken baspasóz máslıhatynda.
Depýtattyń aıtýynsha, pandemııa aýylǵa kimniń janashyr ekenin kórsetip bergen.
«Aýylǵa dári-dármek pen tamaq tasyp, aǵaıynnyń ómirin alyp qalyp jatqan – sol aýyldyń azamattary. Biraq olardyń kópshiligi ákimdikke saılaý kezinde ótpeı qalǵan azamattar. Óıtkeni resmı túrde biraz shekteý bar. Sebebi sol aýylǵa jany ashıtyn, óresi keń azamattar belgisiz sebeptermen ótpeı qalady. Sol úshin halyq aýyl ákimderine senimsizdikpen qaraıdy. Sondyqtan naǵyz eldiń azamatyn saılaý úshin - ádil saılaý bolýy kerek», - dedi ol.
Berik Dúısembınov táýelsiz aýyl ákiminiń aýdan nemese oblys ákimderimen kelispeýshiligi bolýy múmkin ekenin aıtady.
«Osy máseleni sheshý kerek. El saılaǵan ákimdi eshqandaı ákim jumystan shyǵaryp tastaı almaıdy. Ádil saılaýmen myqty azamattardy alar bolsaq, sapaly ult bolýǵa qol jetkize bastaımyz. Aýyldy tek attap ótetin baspaldaq retinde paıdalanatyn adamdar kelmeýi kerek. Halqymyzdyń jartysy aýylda turady. Aýyldardyń ereksheligin eskere otyryp, azamattardy ádil saılaýymyz kerek», - dedi ol.
Foto: akzhol.kz
