Pandemııa áseri: Qazaqstan qandaı ónimderdiń eksportyn azaıtty

NUR-SULTAN. QazAqparat – Saýda jáne ıntegratsııa mınıstri Baqyt Sultanov pandemııanyń saldary Qazaqstannyń eksporttyq áleýetine qalaı áser etkenin aıtyp berdi, dep habarlaıdy QazAqparat tilshisi.

«Memleket basshysy Joldaýynda shıkizattyq emes eksportty ulǵaıtý týraly tapsyrma bergen bolatyn. Onyń jartysyna jýyǵy (42%) qazir joǵary jáne ortasha óńdeý satysyndaǵy ónimderden turady. Onyń kólemi turaqty túrde ulǵaıyp keledi. Óńdelgen eksporttyń negizgi taýarlary - mys jáne mystan jasalǵan katodtar, ferroqorytpalary, ýran, munaı óńdeý ónimi jáne basqalar», - dedi Baqyt Sultanov OKQ-da ótken baspasóz máslıhatynda.

Mınıstrdiń aıtýynsha, álemde pandemııa saldarynan shyqqan saýda-ekonomıkalyq ózgerister bir jaǵynan táýekelderdi týyndatsa, ekinshi jaǵynan otandyq kásiporyndardyń eń joǵary qosylǵan quny bar ónimdi óndirýge kóshýine «múmkindik terezesin» ashady.

«Osy jyly pandemııa áserinen otandyq ónimdi dástúrli satyp alýshylardyń birqatary óziniń óndiris kólemin qysqartyp, qazaqstandyq ónimdi satyp alýdy báseńdetti. 8 aıdyń qorytyndysy boıynsha óńdelgen taýarlardyń eksporty 7,3%-ke – 10,4-ten 9,7 mlrd AQSh dollaryna deıin azaıdy. Eksporttyń negizgi tómendeýi munaı ónimderiniń (-332,6 mln $), ferroqorytpalarynyń (-249,7 mln $), myryshtyń (-121,2 mln $) jetkiziliminiń qysqarýy jáne baǵalardyń tómendeýi esebinen bolyp otyr», - deıdi ol.

Alaıda mınıstr tamaq ónerkásibiniń eksporty kóbeıip, un, kúnbaǵys maıy, makaron ónimderi, sıyr eti, soıa maıyna suranystyń artqanyn aıtady.