Pandemııa Almatyda ınternet-saýdanyń damýyna serpin bergen
ALMATY. QazAqparat - Almatyda jyl basynan bergi taýar aınalym 2 984,1 mlrd teńge boldy. Bul týraly onlaın brıfıng barysynda Almaty qalasy Kásipkerlik jáne ınvestıtsııalar basqarmasynyń basshysy Erkebulan Orazalın málim etti, dep habarlaıdy QazAqparat tilshisi.
Onyń aıtýynsha, qalada birinshi toqsanda taýar aınalym 2 984,1 mlrd teńgeni boldy. Naqty kóleminiń ındeksi – 96,1%. Onyń ishinde bólshek saýda taýar aınalymy 801,2 mlrd teńgeni, naqty kóleminiń ındeksi – 98,6%-dy quraǵan.
«Bul rette, azyq-túliktik taýarlaryn satý 0,9%-ǵa artty, azyq-túliktik emes taýarlaryn satý 2,1%-ǵa tómendedi. Sonymen birge, kompıýter, farmónimder, qurylys materıaldary, kıim jáne aıaq kıimder satylymynyń óskeni baıqalady. Taýarlardyń keń túri satylymynyń tómendegenine (naqty kóleminiń ındeksi – 91,2%, úlesi – 26,5%) qaramastan, quldyraýdyń jalpy qarqyny qysqarýda»,-dedi ol.
Sonymen qatar, azyq-túliktik taýarlaryn satýdyń naqty kóleminiń ındeksi 77,2%-dy, azyq-túliktik emes taýarlar boıynsha – 105,5%-dy qurady. Bul rette qurylys materıaldarynyń satylymy 5,4%-ǵa, avtomobılder satylymy 3,3%-ǵa, taýarlardyń keń túriniń satylymy 8,7%-ǵa artqan.
«Azyq-túliktik emes taýarlar boıynsha satylymnyń quldyraýy myna ónimderde baıqalady, máselen dızel otyny 0,8%-ǵa, syrtqy jabdyqtar 1,2%-ǵa tómendedi. Degenmen osy jylǵy sáýirde satylymnyń oń serpini saqtalýda jáne saýda salasy ári qaraı ósedi degen boljam bar. Satylymnyń ósýine áser etip otyrǵan negizgi sebep, qazirgi ýaqytta saýda nysandary úshin jeńildik jasaý, sondaı-aq kıim, aıaq kıim sekildi azyq-túliktik emes taýarlarǵa degen maýsymdyq suranys bolyp otyr. Sonyń negizinde, bólshek saýda ósimi 4%-dan astam kórsetkishke, onyń ishinde, azyq-túliktik taýarlar 1,6%-ǵa, bul 323,6 mlrd teńge, azyq-túliktik emes taýarlar 5,2%-ǵa, ıaǵnı 769,6 mlrd teńgege ósedi degen boljam bar»,- dedi basqarma basshysy.
Kóterme saýda taýar aınalymy 2 182,9 mlrd teńgeni, naqty kóleminiń ındeksi – 97,6%-dy quraǵan. Al, jalpy Qazaqstan boıynsha kólemi – 5 139,1 mlrd teńge, naqty kóleminiń ındeksi – 99,5% eken.
Erkebulan Orazalınniń aıtýynsha, pandemııa Almatyda ınternet-saýdanyń damýyna serpin berdi. Qala turǵyndary taýarlardy satyp alýdyń osy túrine kóbirek júginýde. Sonymen qatar, onlaın-saýda satýdyń barlyq salalarynda — kıim men sport taýarlarynan bastap turmystyq tehnıkaǵa nemese azyq-túlikke deıin damyp keledi.
