Pandemııa áli aıaqtalǵan joq - DDU EAB basshysy

ALMATY. QazAqparat - Pandemııa áli aıaqtalǵan joq. Bul týraly Qazaqstanǵa is sapary barysynda Dúnıejúzilik densaýlyq saqtaý uıymynyń Eýropalyq aımaqtyq bıýrosynyń basshysy Hans Klıýge málim etti, dep habarlaıdy QazAqparat tilshisi.

Hans Klıýge koronavırýs pandemııasy áli de jalǵasyp jatqanyn aıtyp, halyqty karantın talaptaryn saqtaýǵa shaqyrdy.

«Pandemııa áli aıaqtalǵan joq. Eýropa aımaǵyndaǵy 53 eldiń 18-de ınfektsııa órship tur. Desekte, jaqsy úderis bar, qoǵamda ujymdyq ımmýnıtet qalyptasa bastady, vaktsınatsııa deńgeıi joǵary elderde ekonomıka birtindep qalpyna kelip, ólim-jitim azaıdy», - dedi spıker Almatydaǵy jumys sapary barysynda.

Onyń aıtýynsha, vaktsınatsııa deńgeıi óte tómen elderde ınfektsııa qaıta órship barady.

«Men bolashaqqa senimmen qaraımyn. Koronavırýs bizdi birneshe ret tań qaldyrdy. Erteńgi kúni onyń jańa nusqasy paıda bolýy da múmkin. Alaıda, halyq ony eshqandaı lokdaýnsyz jeńe alady. Tek tórt shartty oryndasa bolǵany:

Birinshiden, halyqtyń áleýmettik jaǵynan álsiz tobyn qorǵaý kerek. Óıtkeni, COVID-19-dan qaıtys bolǵan adamdardyń basym bóligi ekpe almaǵan egde jastaǵy nemese sozylmaly aýrýǵa shaldyqqan adamdar. ıAǵnı, vaktsınatsııa almaǵandar koronavırýsqa qarsy ekpeni alý qajet. Al ekpe alǵandar onyń úshinshi, kúsheıtkish dozasyn alýy tıis.

Ekinshiden, árbir el vırýstyń jańa nusqasy paıda bolǵan kezde basqa memleketterge habarlaý úshin monıtorıngti kúsheıtýi kerek. Ony medıtsınalyq-sanıtarlyq alǵashqy kómek uıymdary arqyly jasaýǵa bolady.

Úshinshiden, koronavırýsqa qarsy preparattardyń qoljetimdi bolýy óte mańyzdy. Vırýsty jeńýdiń jaqsy joly - vaktsınatsııa jáne emdeý.

Tórtinshiden, memleketter qabyldanǵan sharalardy birte-birte jeńildetýi kerek. Alaıda adamdar kóp jınalatyn jerlerde áli de maska taǵýdy usynamyn»,- dedi ol.