Pánaralyq olımpıadanyń oblystyq kezeńiniń jeńimpazdary anyqtaldy - Aqmola oblysy
KÓKShETAÝ. QazAqparat - Aqmola oblysynda jalpy bilim beretin pánder boıynsha 9-11 synyp oqýshylary arasynda respýblıkalyq olımpıadanyń oblystyq kezeńi máresine jetti, dep habarlaıdy QazAqparat tilshisi.
Aqmola oblysy bilim basqarmasynyń málimeti boıynsha Kókshetaý qalasyndaǵy №18 mektepte ótken olımpıadaǵa óńirdiń 17 aýdany men Kókshetaý, Stepnogor qalalary jáne daryndy balalarǵa arnalǵan 4 oblystyq mamandandyrylǵan mektepten jınalǵan 400-ge jýyq oqýshy qatysty.
Olımpıada qorytyndysy boıynsha 1-shi orynǵa oblys ortalyǵyndaǵy «Innovatsııalyq-bilim» lıtseıiniń oqýshylary laıyqty dep tanylsa, odan keıingi 2-shi jáne 3-shi oryndardy Kókshetaý jáne Stepnogor qalalarynyń oqýshylary ózara bólisti.
Jalpy, oblystyq olımpıadanyń nátıjeleri boıynsha barlyǵy 163 jeńimpaz anyqtaldy. Onyń 32-si І dárejeli, 33 qatysýshy ІІ dárejeli, 98-i ІІІ dárejeli dıplomdarmen, budan bólek taǵy 31 qatysýshy dıplomdarmen jáne baǵaly syılyqtarmen marapattaldy.
«Olımpıada aýdandar men qalalardaǵy mektepterde oqýshylardyń belsendiligin kórsetti. Ásirese, oqýshylardyń bir-birin qoldaýyn kórý kóńil súısindiredi», dedi olımpıada jeńimpazdaryn quttyqtaý sózinde Aqmola oblys ákiminiń orynbasary Aına Mysyrálimova.
Aıta keteıik, jalpy bilim beretin pánder boıynsha 9-11 synyp oqýshylary arasynda respýblıkalyq olımpıadanyń oblystyq kezeńinde birinshi jáne ekinshi oryn alǵan jeńimpazdar aǵymdaǵy jyldyń naýryz aıynda Aqtóbe jáne Qyzylorda qalalarynda ótetin respýblıkalyq kezeńine qatysady.
