Panamada jer silkinisinen zardap shekkender sany 6 myńǵa jetti
ASTANA. KAZINFORM — Panamada jer silkinisinen zardap shekkender sany 6 myńǵa jetti, prezıdent Hose Raýl Mýlınonyń aıtýynsha, qaıtys bolǵandar joq, dep habarlaıdy TASS agenttigi.
— Qazirgi ýaqytta 1744 úı tekserildi, al 6174 adam zardap shekken. Áli tekserý júrip jatyr, sondyqtan bul kórsetkish jańartylyp otyrady, — dep málimdedi memleket basshysy.
Mýlıno jer silkinisiniń joıqyn bolǵanyn jáne sarapshylar zardap kólemin baǵalap jatqanyn atap ótti. Úkimet azyq-túlik pen aýyz sý jetkizýdi, joldar men kópirlerdi qalpyna keltirýdi jáne elektr qýatymen qamtamasyz etýdi qolǵa alǵan.
— Men eń muqtaj jandarǵa kómektiń jetýin qamtamasyz etý úshin qajetti resýrstardy aıamaımyn, — dedi prezıdent.
Ol bılik organdary turǵyn úıdi jóndeýge materıaldar jiberetinin jáne Ulttyq polıtsııa mamandarynyń jobalary boıynsha eki jáne úsh bólmeli jańa úıler salý úshin jergilikti merdigerlerdi tartatynyn málimdedi.
Mýlıno, sonymen qatar qoǵamdy tek resmı habarlamalarǵa senýge jáne jalǵan qaýesetter taratpaýǵa shaqyrdy.
— Mundaı jantúrshigerlik jaǵdaılar bolǵan joq, jalǵan habarlamalar tek qajetsiz alańdaýshylyq týdyrady, — dedi Mýlıno áleýmettik jelilerde tsýnamı jáne Panama kanaly arqyly ótetin Amerıka kópiriniń jabylýy týraly taralǵan jalǵan aqparatqa túsinikteme bere otyryp.
Eske sala keteıik, buǵan deıin Panamada 6,1 baldyq jer silkinisi bolǵanyn habarlaǵan edik.
