Tramptyń málimdemesine baılanysty Panama BUU Bas hatshysyna shaǵym túsirdi

ASTANA. KAZINFORM — Panama basshylyǵy BUU Bas hatshysy Antonıý Gýterrıshke hat joldap, onda AQSh prezıdenti Donald Tramptyń Panama kanalynyń kimge tıesili máselesi jáne ony Qurama Shtattar baqylaýyna qaıtarý nıetine qatysty málimdemelerin qabyldamaıtynyn bildirdi.

Bul týraly TASS aqparat agenttigi habarlady.

— Panama prezıdent Donald Tramptyń ınaýgýratsııada sóılegen sózinde AQSh Panama kanalyn qaıtarady dep ýáde bergen málimdemelerine qatysty hat joldady. Panamanyń Nıý-Iorktegi BUU janyndaǵy Elshisi Eloı Alfaro de Alba uıymnyń Bas hatshysy Antonıý Gýterrıshke joldaǵan hatynda BUU Jarǵysyna sáıkes elder qarym-qatynastarynda kez kelgen memlekettiń aýmaqtyq tutastyǵyna nemese saıası táýelsizdigine qarsy kúsh qoldaný qaýpinen nemese kúsh qoldanýdan aýlaq bolý kerek ekenin eske saldy, — delingen Latyn Amerıkasy eliniń SІM málimdemesinde.

Tramp dúısenbide AQSh Kongresiniń ortalyq zaly Rotondada ótken ınaýgýratsııasynda sóz sóılep, Panama kanalyn «qaıtaryp alý» nıetin qaıtalady. Ol kanaldy baqylaýdy Panamaǵa qaıtarý «jasalmaýy tıis bolǵan aqymaq syılyq» dep aıtty. Tramptyń pikirinshe, «Panama kanalyn Qytaı basqaryp otyr».

1914 jyly paıdalanýǵa berilgen Panama kanalyn AQSh salyp, baqylady. 1977 jyly Torrıhos-Karter kelisimi 1999 jyly aıaqtalǵan kanaldy Panamaǵa kezeń-kezeńimen berýdi belgiledi. Kelisim kanaldyń beıtaraptyǵyn jáne onyń álemdik saýdaǵa qoljetimdiligin qamtamasyz etti. Búginde ol jahandyq ekonomıka úshin mańyzdy baǵyt jáne AQSh múddesiniń negizgi salasy bolyp qalyp otyr.

Eske sala ketsek, AQSh-tyń jańa prezıdenti Donald Tramp óz baǵdarlamasyn jedel júzege asyrý maqsatynda Aq úıde birneshe jarlyqqa qol qoıdy.

Sondaı-aq, ol ólim jazasyn federaldy deńgeıde qaıta engizdi.