Panahov referendým jaıly: Tipti bolmashy da zań buzýshylyq oryn alǵan joq

ASTANA. KAZINFORM – Ázerbaıjan Ortalyq saılaý komıssııasynyń tóraǵasy Mazaır Panahov elordada AES boıynsha referendýmǵa oraı pikir bildirdi.

«Ázerbaıjannan referendýmdy baıqaýǵa 13 adam, onyń ishinde Parlamentten - 6, Ortalyq saılaý komıssııasynan 7 adam keldik. Qazaqstanda ornalasqan dıplomatııalyq mıssııadan taǵy úsh adam bar. Saǵat 15:-00-ge deıin 45 ýchaskede daýys berý barysyn baıqap úlgerdik», - dedi ol Ortalyq referendým komıssııasynda ótken brıfıngte.

Ázerbaıjan ókili Qazaqstan saılaý quqyǵy tolyq iske asyrylyp jatqan eldiń jaqsy úlgisi bola alatynyn aıtty. Ár ýchaskede kem degende 10 baqylaýshy kezekshilikte boldy, buqaralyq aqparat quraldarynyń ókilderi de qatysty.

«Men bir ýchaskede adamdar kishkentaı balalarmen birge kelgenin kórip qatty tańǵaldym. Tipti, olardyń saılaýshy emes ekendigi anyq, biraq ata-analary daýys bergende ishte rızashylyqpen júrdi. Bir ýchaskede olar bizdi balalarmen birge sýretke túsirip aldy. Osy turǵyda qazaq halqynyń erkin ekendigi jáne óz qalaýyn bildirgisi keletindigi sezildi», - dedi Mazaır Panahov.

Sonymen qatar ol daýys berý barysynda tipti bolmashy da zań buzýshylyqtyń oryn almaǵanyn atap ótti. Onyń aıtýynsha, ýchaskelerde daýys berýshilerge barlyq jaǵdaı jasalǵan. El turǵyndary óz erikterimen tańdaý jasap jatyr.

Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys berip jatyr.

Respýblıkalyq referendým bıýlleteninde bir ǵana saýal bolady:
– Siz Qazaqstanda atom elektr stantsııasyn salýǵa kelisesiz be?
Daýys berýshi jaýaptyń eki nusqasynyń birin tańdaıdy:
– «Iá, kelisemin» nemese, «Joq, kelispeımin».

1 shildedegi jaǵdaı boıynsha el kóleminde 12 176 968 adam referendýmda daýys berýge haqyly. 

Saǵat 16:00-degi jaǵdaı boıynsha 7 062 358 azamat bıýlleten aldy. Bul tizimge engizilgen azamattardyń 57,68 paıyzyn quraıdy.