Pán olımpıadalaryn ótkizýge qandaı ózgerister engizildi – «Daryn» RǴPO
NUR-SULTAN. QazAqparat – QR BǴM «Daryn» respýblıkalyq ǵylymı-praktıkalyq ortalyǵynyń dırektory Kamıla Basharova pán olımpıadalary men ǵylymı jobalar baıqaýyn ótkizýdegi ózgerister týraly aıtyp berdi, dep habarlaıdy QazAqparat.
Dırektordyń aıtýynsha, oqýshylar arasyndaǵy olımpıadalar qorytyndysy boıynsha ár pánnen «2019 jylǵy Qazaqstannyń úzdik 100 olımpıadalyq mektebi» resmı reıtıngisi qurylǵan.
«Respýblıkalyq ǵylymı jobalar baıqaýy men olımpıadalarda birinshi jáne ekinshi týr jáne ádil qazy alqasynyń jumystardy tekserýi, upaı men júldeli oryndardy bólýi onlaın translıatsııalandy. Qazir olımpıadanyń barlyq mekteptik, aýdandyq, oblystyq kezeńderin dál osyndaı ádildikpen qamtamasyz etý mehanızmderi ázirlenip jatyr», - dedi K. Basharova.
Sonymen birge, ol respýblıkalyq ǵylymı jobalar baıqaýyn ótkizý erejesine ózgeris engiziletinin habarlady.
«Bıylǵy oqý jylynda Qazaqstannyń qurama komandalarynyń basshylaryn anyqtaýda balalardy olımpıadaǵa daıyndap júrgen burynǵy halyqaralyq olımpıada qatysýshylaryna basymdyq berildi. Qazaqstan qurama komandasynyń qatysýshylaryn irikteý ustanymdary jáne olımpıada men oqý-jattyǵý jıyndarynyń reıtıngteri boıynsha qurylýy standarttaldy», - dep atap ótti K. Basharova.
Odan bólek, aqyly oıyndar men konkýrstardy, olımpıadalardy alyp tastap, ornyna tegin ınternet-olımpıadalardy engizý jumystary bastaldy.
«Muǵalimderge arnalǵan aqyly konkýrstar men ózge de sharalardy uıymdastyrýǵa túbegeıli tyıym salyndy. Olar tek «Daryn» RǴPO nemese jiberýshi tarap esebinen ǵana ótýi tıis. Respýblıkalyq jasóspirimder olımpıadasyn uıymdastyrý men ótkizý deńgeıi aıtarlyqtaı kóterildi», - dedi ol.
Ortalyq basshysynyń habarlaýynsha, daryndy balalardy tabý men qoldaý kórsetý ortalyqtarynyń tujyrymdamasy qurylady. Sáıkesinshe, talanttardy tabý, oqytý, damytý jáne qoldaý kórsetýge barynsha yńǵaıly jaǵdaı jasalady jáne árbir ata-ana balalarynyń qabiletin teksertip, usynymdar ala alady.
«Mundaı ortalyqtardy óńirlerdegi «Daryn» ortalyqtarynyń bazasynda qurý josparlanǵan. Olardy qarjylandyrý mehanızmderi jasalyp jatyr. Aýyldar men kishi qalalardaǵy oqýshylar úshin bólek ulttyq zııatkerlik týrnır ótkizý usynyldy. Bul bastamany Tuńǵysh Prezıdent qory qoldady jáne «El úmiti» jobasy aıasynda tolyq baıandalady», - dep atap ótti Kamıla Basharova.
Spıkerdiń aıtýynsha, elimizdiń talantty jastary úzdik trenerlermen olımpıadaǵa jyl boıy júıeli ári sapaly daıyndalýy úshin tegin turaqty onlaın-mektep ashý josparlanyp otyr.
Buǵan deıin «Daryn» respýblıkalyq ǵylymı-praktıkalyq ortalyǵynyń «Bilim berý mazmunyn jańartý jaǵdaıynda pedagogtyń úzdiksiz kásibı damýy» taqyrybyndaǵy tamyz pedagogıkalyq keńesin alǵash ret online rejimde ótkizgeni habarlanǵan edi. Bul keńestiń maqsaty - bilim mazmunyn jańartý jaǵdaıynda mamandandyrylǵan mektepterde sapaly bilim berýdi qamtamasyz etý.
