Pan Gı Mýn: Jerorta teńizinde aı saıyn 450-ge jýyq mıgrant ajal qushady

ASTANA. QazAqparat - Jerorta teńizinde aı saıyn Eýropaǵa bet alǵan 450-ge jýyq mıgrant kóz jumady. Bul jantúrshigerlik málimetti Grekııada ótken baspasóz máslıhaty kezinde BUU-nyń Bas hatshysy jarııa etti, dep habarlady www.24.kz.

 Pan Gı Mýn premer-mınıstr Aleksıs Tsıpraspen kezdesip, Ellada eliniń bosqyndarǵa kórsetip otyrǵan kómegin aıryqsha atap ótti.  

- Ekonomıkalyq qıyndyqtaryna qaramastan, Grekııa bıligi men halqy mıgranttarǵa qaıyrymdylyq tanytyp, qanshama adamnyń ómirin saqtap qalyp jatyr. Memleket kóshi-qon daǵdarysyn óz betinshe sheshýge qaýqarsyz. Sondyqtan oǵan halyqaralyq qaýymdastyq tarapynan úlken kómek kórsetilýi tıis. BUU-nyń Bas hatshysy:Pan Gı Mýn,

BUU Bas hatshysynyń Grekııaǵa sapary 20 maýsymda atap ótiletin Dúnıejúzilik bosqyndar kúnine oraılastyrylyp otyr. Osy rette Pan Gı Mýn Ellada eliniń prezıdenti jáne premer-mınıstrimen kezdesýden keıin, Lesbos aralyndaǵy mıgranttar lagerine baryp qaıtty. Jyl basynan beri memleket shekarasyn asqan 150 myńnan astam mıgranttyń deni dál osy aralǵa kelgen eken.