Pan Gı Mýn: Sırııa halqyna beıbitshilik qajet
ASTANA. 5 qyrkúıek. QazAqparat - BUU Bas hatshysy Pan Gı Mýn sırııalyq daǵdarysty beıbit sheshý qajettigin aıtty. Bul týraly ol keshe Sankt-Peterbor memlekettik ýnıversıtetinde dáris oqyǵan kezde málim etti, dep habarlady Rosbalt.
Pan Gı Mýn bul eldegi azamattyq soǵys 100 myńnan astam adamnyń qazaǵa ushyraýyna, dinaralyq shıelenis ýshyǵýyna, mıllıondaǵan adamnyń óz úılerin tastap ketýine, sondaı-aq búkil aımaqta turaqsyzdyqqa ákep soqqanyn eske saldy.
BUU basshysy jaqyndaǵy urys qımyldary kezinde «hımııalyq qarý qoldanylǵany» týraly shý shyqqandyǵyn atap ótti.. Eger hımııalyq qarýdyń paıdalanylǵanyn BUU Mıssııasy qýattaıtyn bolsa, onda bul halyqaralyq quqyqty óreskel buzǵandyq bolady, dep sanaıdy bas hatshy.
Pan Gı Mýn sırııalyq daǵdarysty saıası jolmen sheshýge tyrysýǵa ýáde berdi. «Qarý tasqyny jáne mılıtarlandyrý janjaly qantógiske dem beredi. Soǵys qımyldaryn toqtatyp, kelissózderdi bastaıtyn kez keldi. Sırııa halqyna beıbitshilik kerek», degen onyń sózin keltirdi BUU jańalyqtar ortalyǵy.
Bas hatshy álemdegi qazirgi daǵdarystardy sheshý jónindegi mindettemelermen qatar uzaq merzimdi mindetterdi de esten shyǵarmaý qajettigin atap ótti. «Olardy keıingi ysyrý - jaǵdaıdy odan ári qıyndatyp, úlken shyǵyndarǵa barý degen sóz. Biz órtti sóndirýmen shektelip qana qoımaı, jarqyn bolashaq negizderin búginnen qalaı bastaýǵa tıispiz», - dep málimdedi Pan Gı Mýn.
