Pan Gı Mýn myńjyldyqtyń damý maqsattarynyń biri - kedeıshilikpen kúres AEF kómegimen sátti aıaqtalatyndyǵyna senim bildirdi

ASTANA. 23 mamyr. QazAqparat - Búgin VI Astana ekonomıkalyq forýmynyń plenarlyq májilisinde BUU Bas hatshysynyń ekonomıkalyq jáne áleýmettik máseleler jónindegi orynbasary Ý Hýnbo májilis qatysýshylaryna Pan Gı Mýnnyń úndeý hatyn oqyp berdi.

«Sizder jahandyq ekonomıkalyq turaqsyzdyq jaǵdaıynda jınalyp otyrsyzdyr. Jumyssyzdyq kóp, quqyqtyq tepe-teńsizdik pen bank júıesiniń álsizdigi áli de saqtalyp otyr. Bunyń bári álemdik ekonomıkany qalpyna keltirý jumysyn tejeýde. Osyndaı jaǵdaıda biz birlesip qyzmet etýimiz kerek. Jańa jumys oryndaryn ashqan jón. Ásirese, áıelder men jastardy jumyspen keńinen qamtý qajet. Menińshe, álemdik ekonomıkany basqarýdyń jahandyq qurylymynda damýshy memleketterdiń múddesi de eskerilýi tıis. Myńjyldyqtyń damý maqsattarynyń biri - kedeıshilikpen kúresti iske asyrý jumysynyń aıaqtalýyna úsh jyldaı ýaqyt qaldy. Dál qazir biz birigip, osy bir myńjyldyq mindetti oryndaýǵa atsalysýymyz qajet. Osy jaǵynan Astana ekonomıkalyq forýmy kómek bolady dep bilemin», - dep atap kórsetti Pan Gı Mýn.