Pan Gı Mýn Iraktaǵy kóne eskertkishterdi saqtap qalýǵa shaqyrdy
ASTANA. QazAqparat - BUU Bas hatshysy Pan Gı Mýn halyqaralyq qoǵamdastyqty «Islam memleketine» Iraktaǵy tarıh pen mádenıettiń kóne eskertkishterin joıýǵa jol bermeýge shaqyrdy.
"Bas hatshy halyqaralyq qoǵamdastyqty lańkestik toptyń mundaı áreketine qarsy turyp, mádenı artefakttardy saqtap qalýǵa shaqyrady", - delingen bas hatshylyqtyń baspasóz habarlamasynda.
BUU Bas hatshysynyń málimdemesinde mádenı eskertkishterdi qasaqana joıý áskerı qylmys bolyp tabylady jáne kináli adamdar jaýapkershilikke tartylýy kerektigi jazylǵan.
Jeksenbi kúni Iraktyń kóne qalasy - bizdiń eramyzǵa deıingi 717 jyly irgesi qalanǵan Dýr-Sharrýkınge zalal keltirildi. Al beısenbide «Islam memleketiniń» sodyrlary ejelgi assırııalyq Nımrýd qalasynyń eskertkishterin joıǵany belgili boldy.
