Pan Gı Mýn BUU-nyń jańa bas hatshysy qyzmetine áıel adamdy saılaýdy usynady

ASTANA. QazAqparat - BUU Bas hatshysy Pan Gı Mýn onyń murageri áıel bolýy tıis dep sanaıdy. Bul týraly sársenbi kúni, 6 mamyrda onyń resmı ókiliniń orynbasary Farhan Hak málim etti, dep habarlady TASS.

«Birqatar resmı sharalarda Pan Gı Mýn áıelderdiń bas hatshy qyzmetin atqaratyn kezi keldi, degendi aıtyp júr», - dep málimdedi ol. Ol sonymen qatar bas hatshy onyń oryntaǵyn basatyn adamnyń aty-jónin aıtqan joq. «Pan Gı Mýn joǵary laýazymdar atqaryp júrgen, sonyń ishinde BUU-da da mártebeli qyzmettegi kóptegen áıeldermen kezdesýler ótkizýde. Olar saılaýǵa qatysa ma, joq pa, ony ózderi sheshedi», - dedi Hak.

BUU Bas hatshysy qyzmetine yqtımal úmitkerlerdiń arasynda BUU Damý Baǵdarlamasynyń úılestirýshisi Helen Klarktiń, ıÝNESKO atqarýshy dırektory Irına Bokovanyń, Chılı men Lıtva prezıdentteri Mıshel Bachelet pen Dalıa Grıbaýskaıteniń, sondaı-aq Danııa premer-mınıstri Helle Tornıng-Shmıdttiń esimderi atalyp júr.

Ońtústikkoreıalyq dıplomat Pan Gı Mýn BUU bas hatshysy qyzmetin 2007 jylǵy 1 qańtardan beri atqaryp keledi. Onyń ókilettik merzimi 2016 jylǵy 31 jeltoqsanda aıaqtalady. Erejege sáıkes ol úshinshi besjyldyq merzimge saılana almaıdy. Agenttiktiń atap ótýinshe, BUU basshysynyń barynsha ádiletti bolýy úshin bul laýazymǵa Qaýipsizdik keńesiniń turaqty músheleri bolyp tabylatyn bes eldiń - Reseıdiń, Qytaıdyń, Birikken Koroldiktiń, AQSh-tyń jáne Frantsııanyń ókilderi saılanbaıdy.

Uıym bas hatshysyn saılaý bylaısha ótedi: áýeli úmitkerdi BUU Qaýipsizdik keńesi qaraıdy, odan keıin Bas Assambleıada 192 el ókilderiniń qatysýymen daýysqa salynady. Jańa bas hatshyny saılaýda Qaýipsizdik Keńesiniń turaqty músheleri úlken ról atqarady, olar kez kelgen jaramsyz úmitkerge veto qoıý quqyǵyna ıe. BUU Bas hatshysy ókildiginiń merzimi - bes jyl.