Pan Gı Mýn: BUU búkil álemde ólim jazasyn toqtatýǵa qol jetkizedi

ASTANA. QazAqparat - 10 qazanda atalyp ótiletin Dúnıejúzilik ólim jazasyna qarsy kúni qarsańynda joldaǵan vıdeoúndeýinde BUU Bas hatshysy Pan Gı Mýn barlyq memleketterdi ólim jazasynan bas tartýǵa nemese ólim jazasynyń oryndalýyna moratorıı engizýge shaqyrdy, dep jazady Rosbalt.

Pan Gı Mýn 7 jyl buryn BUU Bas Assambleıasy ólim jazasyna moratorıı engizý tájirıbesin keńeıtý rezolıýtsııasyn qabyldaǵannan keıin birqatar memleket mundaı jaza qylmys deńgeıiniń tómendeýine ákelmeıtinin moıyndaǵanyn atap ótti. BUU basshysy adamnyń ómir súrý quqy bar ekenin aıta kele, bul jazanyń oryndalýy kezinde sot júıesiniń kez kelgen qatesi orny tolmas qaıǵyǵa soqtyratynyn atap ótti, dep habarlady BUU aqparat ortalyǵy.

BUU Bas hatshysy Fakýltatıvti hattamany ratıfıkatsııalamaǵan memleketterdi bul isti tezdetýge shaqyrdy. Ol bıyl 15 jeltoqsanda bul hattamanyń 25 jyldyǵy (1989 jyldan beri) toılanatynyn atap ótti.