Palestınany jaqtaýshy narazy top AQSh Kongresi ǵımarattarynyń birine basyp kirdi
Izraıldiń Gazadaǵy áreketterine narazy úlken top Vashıngtonnyń Kapıtolııinde ornalasqan AQSh Kongresi ǵımarattarynyń birine basyp kirdi. Polıtsııa aktsııaǵa qatysqan ondaǵan adamdy ustap áketti. Kazinform bul týraly VVS-ge silteme jasap jazady.
Agenttik tilshisi oqıǵa ornynan habarlaýynsha, aktsııany “Beıbitshilik úshin evreı úni” solshyl uıymy uıymdastyrdy. Olar ózderin antısıonıster jáne genotsıdpen kúresýshiler dep ataıdy, talaby – Izraıl men Gazadaǵy soǵysty dereý toqtatý.
Narazylyq aktsııasyna ásirese, AQSh basshysy Djo Baıdenniń Tel-Avıvke sapary sebep bolǵan. Qarsylyq tanytýshylardyń kóbi Baıdendi Izraıldiń kez kelgen áreketine múmkindik berip, Gaza turǵyndaryn qurban etip jatqandardy synǵa almaıdy dep aıyptady.
Demonstranttar «dereý oq jaýdyrýdy toqtatyńdar!» dep urandady. Keıin polıtsııa olardy ustap, ǵımarattan shyǵaryp jatty. Ustalǵandardyń naqty sany belgisiz, biraq ondaǵan adam ekeni anyq.
Gaza aýrýhanasynda jarylys bolǵannan keıin Taıaý Shyǵys elderinde narazylyq sharalary kóbeıdi – Euronews
Palestınalyqtar men olardyń jaqtastary soqqyny Izraıl jasady dep aıyptap otyr. Al Izraıl tarapy ǵımratqa palestınalyq zymyran tústi dep málimdedi.
Narazylyq sharalary álemniń birqatar elinde bolyp jatyr. Iordanııada Izraıl elshiliginiń aldyna bir top adam jınalsa, Beırýtte AQSh elshiliginiń aldyna kelgen. Iordan teńiziniń batys jaǵalaýyndaǵy Hevronda ondaǵan palestınalyq azamat Izraıl sarbazdarymen qaqtyǵysyp qaldy. Nablýs pen Ramallahada da qarsy top aktsııaǵa shyqty.
Baǵdadta mıtıngige qatysýshylar alańǵa jınalyp, “jasyl aımaqqa”, ıaǵnı amerıka úkimeti otyrǵan jerge kirýge tyrysty, biraq qaýipsizdik kúshi olarǵa múmkindik bermedi.
Ystanbulda ereýilshiler jıyny polıtsııamen qaqtyǵysqa ulasyp, 60 adam zardap shekti, tártipsizdikti uıymdastyrǵan bes adam qamaýǵa alyndy. Gaza aýrýhanasyna soqqydan júzdegen adamnyń qaza bolýyna baılanysty Túrkııa bıligi úshkúndik aza tutý jarııalady.
Tegeranda narazy top Izraıl týlaryn órtep, Frantsııa men Ulybrıtanııa elshiligine jumyrtqa laqtyrdy.
Nıý-Iorkte bir ýaqytta Izraıldi jaqtaýshylar men palestınalyqtardy qoldaýshylar kóshege shyqty. Polıtsııa qaqtyǵysty boldyrmas úshin olardy eki topqa bólýge májbúr boldy.
Eske salaıyq, 17 qazanda Gaza aýrýhanasyna áýeden soqqy jasalyp, saldarynan júzdegen adam kóz jumdy. Keıingi málimetke sáıkes, olardyń sany 800-den asty.
Palestına prezıdenti Mahmýd Abbas úshkúndik qaraly kún jarııalady. Ol 19 qazanǵa AQSh basshysy Djo Baıdenmen josparlanǵan kezdesýin kútpesten Ammannan ushyp ketip, Ramallaǵa oralǵan.
HAMAS aýrýhanaǵa shabýylǵa Izraıldi kinálap otyrsa, ızraldik bılik buǵan palestınalyq anklavtan sátsiz ushyrylǵan zymyrandar sebep bolǵanyn jáne oǵan “Islam jıhady” jaýapty ekenin aıtýda.
Keshe D.Baıden Iordanııaǵa saparyn toqtatyp, dereý Izraılge ushyp shyqty. Amerıka prezıdenti Tel-Avıvte Izraıl premer-mınıstr Bınıamın Netanıahý jáne eldiń áskerı kabınetiniń múshelerimen kezdesýde AQSh Izraılge qoldaý kórsetýin jalǵastyratynyn aıtty.
