Palestınany moıyndaǵan elderdiń sany 160-qa jýyqtady

ASTANA. KAZINFORM – Sońǵy kúnderi birqatar Batys elderi Palestınany resmı túrde moıyndady. Bul – sońǵy ondaǵan jyldardaǵy eń aýqymdy qoldaý tolqyny boldy, dep habarlaıdy Kazinform tilshisi.

BUU Bas Assambleıasynyń 80-sessııasynda Frantsııa, Lıýksembýrg, Malta, Monako, Andorra, San-Marıno jáne Belgııa Palestına memleketin resmı túrde tanydy. Buǵan deıin Kanada, Avstralııa, Portýgalııa jáne Ulybrıtanııa osyndaı sheshim qabyldaǵan edi.

Qazirgi tańda Palestınany BUU-ǵa múshe 193 memlekettiń shamamen 160-y moıyndap otyr. Bul álem elderiniń 81 paıyzyna teń.

Sonymen birge, Katolık shirkeýiniń joǵarǵy organy – Vatıkan da Palestınaǵa memleket mártebesin berip, BUU janynda baqylaýshy boldy.

Palestınanyń táýelsizdigi alǵash ret 1988 jylǵy 15 qarashada Aljırde ıAsır Arafat tarapynan jarııalanǵan. Aljır alǵashqylardyń biri bolyp bul memleketti moıyndady. Keıin Afrıka, Azııa, Latyn Amerıkasy jáne ondaǵan arab elderi resmı taný jóninde sheshim qabyldady.

Ulybrıtanııanyń qadamy erekshe nazar aýdardy. El premer-mınıstri Kır Starmer:
— Jaqyndap kele jatqan Taıaý Shyǵystaǵy qasirettiń aldynda biz beıbitshilikke múmkindik qaldyrý úshin jáne eki memleket qurý negizindegi sheshimdi saqtaý úshin áreket etemiz, — dedi.

Al Jazeera arnasynyń baǵalaýynsha, mundaı sheshim Palestınanyń halyqaralyq sýbektiligin kúsheıtip, elge tolyqqandy elshilikter ashýǵa, saýda kelisimderin jasaýǵa, halyqaralyq uıymdarda qoldaý tabýǵa, sondaı-aq Halyqaralyq qylmystyq sotqa júginýge múmkindik beredi.

Degenmen sarapshylardyń aıtýynsha, ózge memleketterdiń tanýy áskerı is-qımyldy toqtatpaıdy ári Izraıldiń okkýpatsııasyn birden joıa almaıdy.

Al Izraıl bul qadamdy qatań synǵa aldy. Eldiń BUU janyndaǵy turaqty ókili Dennı Danon sammıtti «tsırk» dep atap, mundaı taný «terrorızmdi marapattaý» dedi.

Premer-mınıstr Bınıamın Netanıahý da «palestınalyq memleket eshqashan qurylmaıdy» dep málimdedi.

AQSh dástúrli ustanymyn saqtap otyr. Vashıngton Palestınany tek Izraılmen kelissózder arqyly «eki memleket» sheshimi júzege asqan jaǵdaıda ǵana moıyndaıtynyn birneshe ret málimdegen.

Qazirgi ýaqytta Palestınanyń BUU-ǵa tolyq múshe bolýy úshin Qaýipsizdik keńesiniń maquldaýy qajet, al AQSh bul bastamany veto quqyǵy arqyly bógep keledi.

Keı elder Palestınany moıyndamaýyn beıbit kelisimniń tolyq bolmaýymen túsindiredi. Negizgi daýly máseleler – bolashaq shekaralar, Ierýsalımniń mártebesi jáne bosqyndardyń taǵdyry.

Buǵan qosa, el ishinde saıası bólinis saqtalǵan: Batys jaǵalaýdy – FATH, al Gazany – HAMAS baqylaýda ustap otyr.

2025 jyldyń qyrkúıegine qaraı Palestınany moıyndaǵan elderdiń sany 160-qa jýyqtady. Bul jolǵy qoldaý tolqyny halyqaralyq landshafttaǵy ózgeristerdi kórsetip otyr: buryn Palestınaǵa negizinen Azııa, Afrıka jáne Latyn Amerıkasy elderi qoldaý tanytsa, búginde Eýropa jáne anglosakson álemi elderi de qatarǵa qosyldy.

Sarapshylardyń pikirinshe, bul taný tolqyny qaqtyǵysty sheshpese de, Izraılge qysymdy kúsheıtip, palestınalyqtarǵa jańa dıplomatııalyq múmkindikter ashyp otyr.

Sonymen qatar «eki memleket – eki halyq úshin» qaǵıdatyn kún tártibinde ustaýǵa septigin tıgizedi.