Palestınany memleket retinde Belgııa da moıyndady

ASTANA. KAZINFORM — Belgııa Palestınany memleket retinde moıyndaǵan elder tobyna qosyldy, dep habarlaıdy TASS. 

Bul týraly premer-mınıstr Bart De Vever BUU Bas assambleıasynyń 80-sessııasy aıasynda málimdedi. 

— Belgııa árqashan eki memlekettiń sheshimin qorǵap keldi jáne búgin Nıý-Iork deklaratsııasyna qol qoıǵan elderdiń qataryna qosyldy. Tek osyndaı sheshim Izraıl men Palestına halqyna beıbitshilik pen qaýipsizdikte ómir súrýge múmkindik beredi, — dedi premer-mınıstr.

Bart De Vever Izraıl saıasatkerleriniń, sonyń ishinde premer-mınıstrdiń «Palestına memleketi bolmaıdy» degen málimdemeleri palestınalyqtardy qoldaýdyń qosymsha sebebi bolyp tabylatynyn aıtty.

— Sondyqtan Belgııa búginde BUU Bas Assambleıasy aıasynda Palestına memleketin moıyndaǵanyn jarııalaǵan elder tobyna qosylý arqyly álemge myqty saıası sıgnal berip otyr, — dedi De Vever.

Buǵan deıin Frantsııa prezıdenti Emmanıýel Makron BUU Bas Assambleıasynyń otyrysynda sóılep, óz eliniń Palestına memleketin resmı túrde moıyndaıtynyn jarııalady.