Palestınany qalpyna keltirý úshin kem degende 53,2 mıllıard dollar qajet — BUU

ASTANA. KAZINFORM — Birikken Ulttar Uıymy men onyń seriktesteri jarııalaǵan sońǵy esep boıynsha, Gaza sektory men basyp alynǵan Batys jaǵalaýdy qalpyna keltirýge aldaǵy on jylda 53,2 mıllıard AQSh dollary qajet bolady.

News.un saıtynyń habarlaýynsha, Birikken Ulttar Uıymy «Shyǵyndar men qajettilikterdi baǵalaý esebi» dep atalatyn baıandamasyn jarııalady.

Esep Palestınadaǵy soǵystan zardap shekken ınfraqurylymdy qalpyna keltirý quny 29,9 mıllıard AQSh dollaryn quraıtynyn, al ekonomıkalyq jáne áleýmettik salalardy qalpyna keltirý úshin 19,1 mıllıard AQSh dollaryn qajet etetinin kórsetedi.

Olardyń ishinde turǵyn úıdi qaıta qurý qajettilikteri eń ózekti bolyp otyr. Qalpyna keltirýge jumsalatyn jalpy shyǵyndardyń 30% baspanaǵa qajet. Bul 15,2 mıllıard AQSh dollary ınvestıtsııasyna teń.

Sonymen birge, Birikken Ulttar Uıymy tek aldaǵy úsh jylda negizgi memlekettik qyzmetterdi turaqtandyrý jáne uzaq merzimdi qalpyna keltirýge negiz qalaý úshin shamamen 20 mıllıard AQSh dollaryn qajet etetinin málimdedi.

Birikken Ulttar Uıymynyń basyp alynǵan Palestına terrıtorııasyndaǵy gýmanıtarlyq úılestirýshisi Mohannad Hadı halyqaralyq qaýymdastyqty Palestınany qaıta qurýdy birlesip ilgeriletý úshin birigýge jáne yntymaqtastyqqa shaqyra otyryp, Gazanyń tolyq qalpyna kelýi Palestına bıliginiń qalpyna kelýine de baılanysty ekenin basa aıtty.

Muhannad Hadı Gazanyń bolashaǵynyń Birikken Ulttar Uıymynyń qararlary men halyqaralyq quqyqqa negizdelýi kerektigin, astanasy Ierýsalım bolatyn «eki memleketti sheshimniń» eń jaqsy nusqa ekenin aıtty.

Eske sala keteıik, buǵan deıin Izraıl 17 aqpanda Gaza sektoryna qatysty kelisimniń ekinshi kezeńin talqylaıtynyn jazǵan bolatynbyz.