Palestınalyqtar Gazada Izraıl soqqylarynan 10 turǵynnyń mert bolǵanyn habarlady

ASTANA. KAZINFORM – Izraıl jeksenbi kúni Gaza sektoryna soqqy jasap, keminde 11 palestınalyq kóz jumdy, dep málimdedi Palestınanyń resmı tulǵalary. Izraıl áskeri shabýyldy HAMAS tarapynan atysty toqtatý rejımin buzý áreketine jaýap dep atady Reuters.

Palestınalyq medıkter shatyr qurylǵan lagerden 4 adam mert bolyp, taǵy 5 adamnyń Gazanyń ońtústigindegi Han-ıÝnıs qalasyna jasalǵan shabýyldan kóz jumǵanyn málimdedi. Sondaı-aq sektordyń soltústiginde taǵy bir adam atyp óltirilgen. Áýeden jasalǵan soqqy Gaza qalasynda bolýy yqtımal «Islam jıhady» tobynyń komandırine baǵyttalǵan.

HAMAS ókili Hazem Kasem bul shabýyldardy atysty toqtatý kelisiminiń óreskel buzylýy dep atap, onyń Donald Tramp tóraǵalyq etetin AQSh-taǵy Beıbitshilik keńesiniń alǵashqy otyrysyna sanaýly kún qalǵanda bolǵanyna nazar aýdardy. Atalǵan jıynda Gaza sektorynyń bolashaǵy talqylanýy tıis.

Óz kezeginde ızraıldik áskerı sheneýnik soqqylardyń «nysanaly» sıpatta bolǵanyn jáne halyqaralyq quqyq talaptaryna saı júzege asyrylǵanyn aıtty.

Onyń sózinshe, HAMAS qazan aıynda jasalǵan atysty toqtatý týraly kelisimdi birneshe márte buzǵan.

Soǵys 2023 jylǵy 7 qazanda HAMAS-tyń Izraıldiń ońtústigine jasaǵan shabýylynan keıin bastalǵan. Ol kezde 1 200-den astam adam qaza tapqan. Al HAMAS baqylaýyndaǵy densaýlyq saqtaý mınıstrliginiń deregine sáıkes, Gaza sektorynda qaza bolǵandar sany 72 myńnan asyp ketken.

Osyǵan deıin Gaza sektorynda bir táýlikte 5 palestınalyq qaza tapqany týraly jazdyq.