Palestınaǵa qarý satqan ıordanııalyq depýtat 10 jylǵa sottaldy
ASTANA. KAZINFORM – Iordanııa soty el parlamentiniń burynǵy depýtaty Imad ál-Adýandy 10 jylǵa sottady. Ol Iordan ózeniniń Batys jaǵalaýyna kontrabandalyq jolmen qarý tasymaldaǵan, dep habarlaıdy Kazinform-nyń menshikti tilshisi.
Izraıl shekarashylary depýtatty 2023 jyldyń sáýirinde kontrabandalyq altyn men qarý-jaraqpen «Korol Hýseın kópiri» retinde belgili Allenbı shekara ótkelinde ustaǵan. Iordanııalyq depýtattyń kóliginen ol Palestınaǵa jetkizbek bolǵan 137 atys qarýy anyqtaldy.
Tergeý barysynda anyqtalǵandaı, burynǵy depýtat 2022 jyldyń aqpan aıynan beri dıplomatııalyq tólqujatyn paıdalanyp 12 kontrabanda operatsııasyn jasaǵan. Ál-Adýan Batys jaǵalaýǵa qarý-jaraqtan bólek janýarlar, qustar, elektrondy temeki men altyndy zańsyz alyp kelgen.
Ol Izraılde ustalǵannan keıin kóp uzamaı, Iordanııaǵa tapsyryldy. Hashımıt koroldiginiń bıligi Izraılmen ál-Adýan úshin bultartpaý sharasyn ózderi tańdaıtyny týraly kelisti. Iordan memlekettik qaýipsizdik sotynyń prokýrory burynǵy depýtatqa aıyp taqty.
Keıin sot ony 10 jylǵa sottaý týraly úkim shyǵardy.
