Palestınadaǵy saılaý: daýys berý naýqany qalaı ótti
ASTANA. KAZINFORM – Palestınada Batys jaǵalaý men Gaza sektorynda jergilikti saılaý ótti, dep habarlaıdy Anadolý.
Daýys berý okkýpatsııalanǵan Batys jaǵalaýda jáne Gaza sektoryndaǵy Deır-el-Balah qalasynda uıymdastyryldy. Palestına Ortalyq saılaý komıssııasynyń tóraǵasy Ramı Hamdalla saılaý kúrdeli áleýmettik-ekonomıkalyq jaǵdaıda ótkenin málimdedi.
– Saılaý Izraıl okkýpatsııasynan týyndaǵan qıyndyqtarǵa qaramastan ótti, – dedi Ramı Hamdalla.
Onyń aıtýynsha, daýys berýge shamamen 1 mln 30 myń saılaýshy qatysqan. Saılaý 491 ortalyqtaǵy 1922 ýchaskede uıymdastyryldy.
Gaza sektoryndaǵy Deır-el-Balah qalasynda daýys berý erekshe jaǵdaıda ótti. Izraıl tarapynan saılaý jabdyqtaryn jetkizýge shekteý qoıylǵandyqtan, qajetti materıaldar jergilikti jerde daıyndalǵan. Sonymen qatar daýys berý úshin arnaıy shatyrlar ornatylyp, gýmanıtarlyq uıymdar qoldaý kórsetken.
Aldyn ala málimet boıynsha, saılaýshylardyń kelý deńgeıi 50-60% shamasynda bolǵan.
Saılaý qorytyndylary jeksenbi kúni jarııalanady dep kútilýde. Kandıdattar nátıjelerge bir apta ishinde sot arqyly shaǵymdana alady.
Aıta keteıik, Palestınada 2005 jyldan beri prezıdenttik, al 2006 jyldan beri parlamenttik saılaý ótkizilmegen. 2007 jyldan bastap el saıası jáne aýmaqtyq bóliniske ushyrap otyr: Gaza sektoryn HAMAS baqylasa, Batys jaǵalaýdy FATH qozǵalysy, onyń ishinde Mahmýd Abbas jetekshilik etetin ákimshilik basqarady.
Sarapshylardyń pikirinshe, bul saılaý jergilikti basqarý ınstıtýttaryn qalpyna keltirýge jáne Gaza men Batys jaǵalaý arasyndaǵy ákimshilik birlikti nyǵaıtýǵa baǵyttalǵan mańyzdy qadam sanalady.
