Palestınada prezıdent pen parlament saılaýy bir kúnde ótedi
ASTANA. KAZINFORM – Palestına prezıdenti Mahmýd Abbas prezıdenttik jáne parlamenttik saılaýdy 2027 jylǵy 11 qyrkúıekte bir mezgilde ótkizý týraly jarlyqqa qol qoıdy, dep habarlaıdy Anadolu.
Palestınanyń WAFA aqparat agenttiginiń málimetinshe, Mahmýd Abbas Palestınany azat etý uıymy Atqarýshy komıtetiniń sheshimine sáıkes, parlamenttik saılaýdy 2026 jylǵy 28 qarashada ótkizý týraly burynǵy jarlyqtyń kúshin joıǵan.
Jańa jarlyqqa sáıkes, prezıdenttik jáne parlamenttik saılaý 2027 jylǵy 11 qyrkúıekte qatar uıymdastyrylady.
Saılaý barysynda Ierýsalımde, Iordan ózeniniń Batys jaǵalaýynda jáne Gaza sektorynda turatyn palestınalyqtar memleket prezıdenti men Palestına zań shyǵarý keńesiniń depýtattaryn saılaı alady.
Qujatta saılaýdyń erkin ári tikeleı daýys berý arqyly ótýi kózdelgen.
WAFA agenttiginiń habarlaýynsha, bul sheshim Palestınadaǵy saıası partııalarmen jáne ózge de saıası kúshtermen júrgizilgen jalpulttyq konsýltatsııalar nátıjesinde qabyldanǵan.
– Izraıldiń áreketteri saılaýdy buryn belgilengen merzimde ótkizýge kedergi keltirdi. Sondyqtan erkin, ádil ári barlyq saılaýshyny qamtıtyn daýys berýdi uıymdastyrý úshin tıisti saıası jaǵdaı qalyptastyrý qajet. Sonymen qatar qaýipsizdikti qamtamasyz etip, jergilikti jerlerde qolaıly ahýal jasaý mańyzdy, – dep túsindirilgen saılaý merzimin ózgertý týraly sheshimde.
Osylaısha Palestına bıligi prezıdenttik jáne parlamenttik saılaýdy bólek ótkizýden bas tartyp, eki saıası naýqandy bir kúnge biriktirýdi uıǵardy.
Jańa saılaý merzimi barlyq aýmaqta daýys berýdi uıymdastyrýǵa qajetti jaǵdaı jasaýǵa múmkindik beredi dep kútiledi.
Aıta keteıik, buǵan deıin Mahmud Abbas Palestınada 20 jylda alǵash ret parlament saılaýyn 2026 jylǵy 28 qarashada ótkizýdi josparlap otyrǵanyn málimdegen bolatyn. Palestına zań shyǵarý keńesiniń sońǵy saılaýy 2006 jyly ótken.
