Palestına Syrtqy ister jáne ekspatrıanttar mınıstrliginiń resmı málimdemesi
Qazaqstandaǵy Palestına Elshiligi Palestına Memleketi Syrtqy ister jáne ekspatrıanttar mınıstrliginiń málimdemesin taratty, dep habarlaıdy Kazinform agenttigi.
«Biz saıası kókjıekti shekteýdiń, Palestına halqyn óz taǵdyryn ózi sheshýge jáne memleket qurýǵa zańdy quqyǵyn júzege asyrý múmkindiginen aıyrýdyń saldary týraly birneshe ret eskerttik. Sondaı-aq, kúndelikti arandatýshylyq pen shabýyldardyń, qonystanýshylar men basqynshy kúshterdiń toqtaýsyz lańkestik áreketteri, ál-Aqsa meshiti jáne hrıstıandar men musylmandardyń qasıetti oryndaryna jasalǵan reıdterdiń saldary týraly da eskertildi», - delingen málimdemede.
Mınıstrliktiń resmı málimdemesinde Palestınada qaýipsizdik, turaqtylyq jáne beıbitshiliktiń qalaı qamtamasyz etiletini aıtylǵan.
«1967 jylǵy astanasy Shyǵys Ierýsalım bolǵan Palestına memleketiniń jerine Izraıl basqynshylyǵy aıaqtalyp, halyqtyń táýelsizdik pen egemendik quqyqtary moıyndalǵanda bizdiń aımaqta qaýipsizdik, turaqtylyq jáne beıbitshilikti qamtamasyz etiledi.
Izraıldiń qol qoıylǵan kelisimderden bas tartýy jáne halyqaralyq zańdylyq rezolıýtsııalaryn saqtamaýy beıbitshilik protsesiniń kúıreýine, 75 jyl azap pen kóship-qonýǵa ushyraǵan Palestına máselesiniń sheshimin tappaýyna jáne qos standart saıasatynyń jalǵasýyna ákeldi. Halyqaralyq qaýymdastyqtyń Izraıl basqynshy kúshteriniń Palestına halqyna qarsy qylmystyq jáne násilshildik áreketterine qatysty únsiz qalýy jáne palestınalyqtardyń osy kúnge deıin kórip kele jatqan ádiletsizdigi men qysymy jaǵdaıdy qatty ýshyqtyryp, tynyshtyqtyń buzylýyna sebep boldy. Beıbitshilik protsesi Palestına halqy úshin ádilettilikti, erkindik pen táýelsizdikti, bosqyndardyń qaıtarylýyn jáne halyqaralyq zańdylyqqa sáıkes qararlardyń tolyq oryndalýyn talap etedi», - delingen Palestına memleketi Syrtqy ister jáne ekspatrıanttar mınıstrliginiń málimdemesinde.