Palestına prezıdenti ulttyq keńeske saılaý ótkizý týraly jarlyqqa qol qoıdy
ASTANA. KAZINFORM — Palestına prezıdenti Mahmýd Abbas senbi kúni Palestınanyń Ulttyq keńesiniń (PUK) jańa shaqyrylymyna 2025 jyldyń sońyna deıin saılaý ótkizý týraly jarlyqqa qol qoıdy, dep jazady Sınhýa.
Palestınalyq VAFA aqparat agenttiginiń habarlaýynsha, bul jarlyq 17 shildede ótken Palestınany azat etý uıymynyń (PAU) atqarýshy komıtetiniń otyrysynda saılaýdy osy jyldyń sońyna deıin ótkizý týraly sheshiminen keıin qabyldanǵan.
VAFA agenttiginiń málimetinshe, saılaý kúni atqarýshy komıtetiniń tóraǵasynyń sheshimimen anyqtalady.
Ulttyq keńeske 350 múshe enedi, olardyń úshten ekisi — Palestına aýmaǵynda turatyndar, al qalǵan úshten biri — sheteldegi palestınalyq dıaspora ókilderi bolady.
Agenttik málimdegendeı, atqarýshy komıtet saılaý ótkizý úshin qajetti is-sharalardy uıymdastyrýmen aınalysatyn daıyndyq komıtetin qurý týraly sheshim qabyldaıdy.
Palestınanyń Ulttyq keńesi — Palestınany azat etý uıymynyń parlamenttik organy sanalady jáne onyń quramyna Palestına ishindegi jáne syrtyndaǵy ártúrli fraktsııalar, qozǵalystar, kásipodaqtar men toptardyń ókilderi kiredi.
Budan buryn Izraıl shabýyldary saldarynan Gazada bir táýlikte 110 palestınalyq qaza tapqany habarlandy.