Palestına marshy: belsendi Túrkııaǵa deıin jaıaý júrip, qaıyrymdylyqqa qarajat jınap keledi
ASTANA. KAZINFORM — Brıtandyq belsendi Rýt Gerbert Ulybrıtanııadan Túrkııanyń Ystambul qalasyna deıin jaıaý júrip, Medical Aid for Palestinians («Palestınalyqtarǵa medıtsınalyq kómek») uıymyna qaıyrymdylyq qarajatyn jınady, dep habarlaıdy Anadoly.
52 jastaǵy Rýt Gerbert 2025 jylǵy 2 mamyrda Anglııadaǵy Arnsaıd qalasynan saparyn bastaǵan. Ol osy ýaqytqa deıin Ulybrıtanııa, Frantsııa, Shveıtsarııa, Italııa, Slovenııa, Chernogorııa, Albanııa, Soltústik Makedonııa jáne Grekııa arqyly ótip, Túrkııaǵa jetti.
Belsendiniń «Palestına úshin úlken marsh» dep atalǵan sapary 6,5 aıǵa sozyldy. Gerbert bul saparyn 15 qarasha, senbi kúni Ystambulda aıaqtamaq.
Qazirgi ýaqytta ol 50 myń fýnt sterlıngke jýyq qarjy jınaǵan. Anadoly agenttigine bergen suhbatynda belsendi óziniń ıdeıasy qalaı paıda bolǵanyn jáne bul sapardan ne kútetinin aıtyp berdi.
— Palestınalyqtardyń shekken azabyn kórip, men beıjaı qarap otyra almadym. Narazylyq aktsııalaryna qatysý jetkiliksiz ekenin sezindim. Sondyqtan Medical Aid for Palestinians uıymyna qoldaý kórsetý úshin jaıaý júrip, qarajat jınaý ıdeıasyn oılap taptym, — dedi Rýt Gerbert.
Ol bul qıyn kezeńde palestınalyqtarǵa kóbirek kómekteskisi keletinin jáne olardyń kúresin qoldaıtyn adamdarmen kezdesýdi maqsat etkenin aıtty.
— Gazadaǵy qorqynyshty kórinister adamzattyń júregine jara saldy. Men bul sapar palestınalyqtarǵa rýhanı jáne moraldyq demeý bolady dep úmittenemin. 6 jarym aı ótti, senbi kúni men jolymdy Ystambulda aıaqtaımyn. Palestınaǵa uzaq merzimdi qoldaý qajet. Eger ár adam az da bolsa úles qossa, biz úlken tolqyn týdyra alamyz. Bul tolqyn ósken saıyn, oǵan jańa adamdar qosylady, jáne biz jalǵyz emestigimizdi túsinemiz, — dedi belsendi.
Gerbert adamdardy úmitin joǵaltpaýǵa jáne kúresti jalǵastyrýǵa shaqyrdy.
— Kez kelgen qarsylasý men ádildik úshin kúres ýaqyt pen kúshti talap etedi. Meniń oıymsha, bizdiń adamgershiligimiz Palestınamen synalyp jatyr. Palestınaǵa degen kózqarasymyz — bizdiń álemge jáne bolashaqqa áserimizdi kórsetedi. Biz adamdardyń qyrylyp, úılerinen aırylyp jatqanyn jaı ǵana qarap otyra almaımyz. Biz ádildik úshin kúresti jalǵastyrýymyz kerek. Palestınaǵa beıbitshilik pen ádildik qajet. Olar shyn máninde aýadaı kerek, — dedi ol.
Sapar barysynda belsendi 12 el arqyly júrip ótken, kóptegen adammen kezdesken jáne tegin tamaq pen tegin túnetý sııaqty qaıyrymdylyq kómekterin kórgenin aıtty.
Rýt Gerbert jınalǵan qarajat kólemi 50 myń fýnt sterlıng mejesine jaqyndaǵanyn, bul qarajat Medical Aid for Palestinians uıymyna aýdarylatynyn málimdedi.
— Úıge oralý — men úshin úlken ózgeris bolady, sondyqtan ózimdi soǵan daıyndap júrmin. Alty aı boıy osy ispen aınalystym, sondyqtan qaıta beıimdelý ońaı bolmaıdy. Biraq men úıge poıyzben qaıtýdy josparlap otyrmyn — sol kezde júrgen búkil jolymdy terezeden kóre alamyn. Sodan keıin otbasymmen Londonda kezdesemin, — dedi belsendi.
Aıta keteıik, BUU Dúnıejúzilik azyq-túlik baǵdarlamasynyń (DBAB) qyzmetkerleri atysty toqtatý týraly kelisim kúshine engen kúnnen beri Gaza sektorynda shamamen 1 mıllıon adamǵa azyq-túlik jıyntyǵyn taratty. Alaıda uıym ókilderi mundaı kómek kólemi qazirgi kúrdeli jaǵdaıda jetkiliksiz ekenin málimdedi.