Palestına-Izraıl qaqtyǵysynyń ekinshi aptasy taǵy da qyndy qyrǵynǵa ulasty
AMMAN. QazAqparat – Palestına-Izraıl qaqtyǵysynyń ekinshi aptasy joıǵysh ushaqtardyń bombalaýy men zymyrandardyń kezektese jarylǵan daýysynan bastaldy. Áskerı áreketterdiń qarqyny údemese báseńdegen joq, dep habarlaıdy QazAqparat tilshisi Reuters-ke silteme jasap.
17 mamyrǵa qaraǵan túni ızraıldik avıatsııa «HAMAS» uıymynyń jerasty tonnelderin bombalady, al palestınalyq tarap Izraıl qalalaryn zymyranmen atqylady. Gaza sektoryndaǵy resmı ókilderdiń habarlaýynsha, ótken jeksenbi – apta boıy qaqtyǵys kezindegi ólim sany eń kóp bolǵan kún.
Gaza Densaýlyq saqtaý mınıstrliginiń dereginshe, jeksenbi kúni Izraıl tarapy jasaǵan áýe soqqysynyń saldarynan birneshe úı qırap, 42 adam qaza tapqan. Olardyń arasynda 16 áıel men 10 bala bolǵan.
Odan keıin Izraıl áskerleri sodyrlardyń tonnel júıesine soqqy jasalǵany týraly habarlaǵan.
«Tonnelderdiń opyrylýy onyń ústinde turǵan úılerdiń qıraýyna ákelgen. Sonyń saldarynan beıbit turǵyndar qaza tapqan», - delingen Izraıl qorǵanys áskeri – TsAHAL habarlamasynda.
Izraıl áskerıleri «HAMAS» tobymen baılanysty kóshbasshylardy kózdep otyrǵanyn málimdedi. Erterek olar «HAMAS» kóshbasshy ıAhıa Sınvar men onyń inisi Mýhammed Sınvardiń úılerine soqqy jasaǵan.
Dúısenbige qaraǵan túni áskerı áreketter burynǵy qarqynmen jalǵasty.
«Áskerılerdiń aıtýynsha, Gazadan Izraıl qalalary Ashkelon men Beer-Shevany zymyrandarmen atqylaǵannan keıin ızraıldik ushaqtar HAMAS-tyń joǵary deńgeıdegi komandırleriniń toǵyz úıine soqqy jasaǵan. Úılerdiń keıbiri qarý saqtaýǵa paıdalanylǵan», - delingen habarlamada.
Izraıldik áskerı-áýe kúshteri arasynda Gazanyń basty medıtsınalyq mekemesi – tórt qabatty Al-Shıf aýrýhanasy bar úkimettik mekemeler men úılerge ushaqtan júzdegen áýe shaýbylyn jasaǵan, dep habarlaıdy Middle Ease Eye.
Bombalaý elektrlik jetkizý symdaryn zaqymdady. Bul anklavtyń aıtarlyqtaı aýmaǵynda elektrdiń sónýine alyp keldi.
Osy oraıda qaqtyǵysqa álemniń alańdaýshylyǵy kúsheıýde.
BUU-nyń bas hatshysy Antonıý Gýterrısh ári qaraıǵy áskerı áreketterdiń óńirdi «eńserilmeıtin daǵdarysqa» ushyratý múmkin ekenin eskertti. Ol bul «sumdyqty» toqtatýǵa shaqyrdy.
Budan erterek Izraılge AQSh Memlekettik departamentiniń ókili deeskalatsııa boıynsha kelissózge qatysý úshin kelgen bolatyn.
Jeksenbi kúni, 16 mamyrda AQSh úshinshi ret Izraıl men «HAMAS» arasyndaǵy qaqtyǵysty toqtatýǵa shaqyrǵan BUU Qaýipsizdik Keńesiniń birlesken málimdemesin buǵaqtady, dep habarlaıdy The Times of Israel.
Dúısenbi kúni tańerteń Izraıl áskerı ushaqtary Gaza qalasynyń birneshe aýdanyna 80 áýe soqqysyn jasady. Onyń aldynda «HAMAS» áskerıleri Izraıldiń ońtústik jaǵyna zymyrandar jibergen bolatyn, dep habarlaıdy BBC.
BUU-da Gazadaǵy otyn jetispeýshiligi týraly eskertti. Bul aýrýhanalar men basqa mekemelerde elektrdiń óshirilýine ákeledi.
BUU-nyń taıaý shyǵystaǵy beıbit protsess boıynsha arnaıy úılestirýshisiniń orynbasary Lınn Hastıngs Izraıl bıligine BUU-ǵa otyn men materıaldar kirgizýge ruqsat berýin suraǵan. Izraıl bıliginen munyń qaýipti ekeni jóninde jaýap alǵan.
Qazirgi kezde Gaza sektorynyń Densaýlyq saqtaý mınıstrliginiń dereginshe, anklavta qaza tapqandar sany – 197 adam, olardyń ishinde 58 bala men 34 áıel bar. 1 230 adam jaraqat alǵan. Tel-Avıv qaza tapqandar arasynda ondaǵan áskerılerdiń bar ekendigi týraly habarlaǵan. Izraılde qaza tapqandar sany – 10 adam, arasynda eki bala bar.
