Palestına-Izraıl qaqtyǵysy: Gaza Sektorynda jarylys saldarynan jýrnalıst qaza tapty
AMMAN. QazAqparat – Izraıldiń áýe soqqylarynyń saldarynan Gaza Sektorynda palestınalyq jýrnalıst qaza tapty, dep habarlaıdy QazAqparat tilshisi Al Jazeera-ǵa silteme jasap.
Ótken túni «Ierýsalım daýysy» palestınalyq radıosynyń reporteri men júrgizýshisi ıÝsef Abý Hýseın ızraıldik áýe soqqysy saldarynan qaza tapty. Aqparatty Dunya Al Watan jáne The Palestine Chronicle palestınalyq aqparat portaldary rastap otyr.
19 mamyrda tańsáride gaza Sektorynyń batysyndaǵy Sheıh Redvan aýdanynda ornalasqan jýrnalıstiń úıine ushqyshsyz basqarylatyn ushý apparaty shabýyl jasaıdy.
Óz kezeginde «Ierýsalım daýysy» radıosy óz qyzmetkeriniń ólimine kinálilerdi jaýapqa tartýdy talap etti.
Ótken túni palestınalyq jýrnalıstpen qosa, Gazanyń kem degende 4 turǵyny Izraıl áskerı-áýe kúshteriniń soqqylary saldarynan qaıtys boldy.
Qaqtyǵys shıelenise bastaǵan kezden beri kem degende 219 palestınalyq Gazada mert boldy, arasynda 63 bala bar. Taǵy 1,5 myń palestınalyq jaraqattanǵan.
Bul kezde Izraılde 12 adam qaıtys bolǵan, arasynda eki bala bar. Jaraqat alǵan Izraıl turǵyndarynyń sany 300-den kem emes.
Arsen Óteshov
