Palestına halyqaralyq qaýymdastyqty Nıý-Iork deklaratsııasyn qoldaýǵa shaqyrdy
ASTANA. KAZINFORM — Palestınanyń Syrtqy ister mınıstrligi seısenbi kúni halyqaralyq qaýymdastyqty Palestına máselesin «eki halyqqa — eki memleket» prıntsıpi negizinde sheshýge baǵyttalǵan Nıý-Iork deklaratsııasyn qabyldap, ony is júzinde júzege asyrýǵa shaqyrdy, dep jazady Sınhýa.
Mınıstrliktiń málimdeýinshe, bul qujat — Gaza sektoryndaǵy atysty toqtatýdyń jáne beıbitshilikke qol jetkizýdiń kilti bolyp sanalady.
Málimdemede 22 qyrkúıekte Nıý-Iork qalasynda Saýd Arabııasy men Frantsııa tóraǵalyǵymen ótken halyqaralyq konferentsııanyń qorytyndysy boıynsha jarııalanǵan birlesken kommıýnıke quptalatyny aıtylǵan.
— Konferentsııaǵa qatysyp, palestın halqyna qoldaý bildirgen, halyqaralyq quqyq pen zańdy halyqaralyq qararlarǵa beıildiligin kórsetken, sondaı-aq Nıý-Iork deklaratsııasyn qabyldaǵan nemese Palestına memleketin moıyndaǵan barlyq elge alǵysymyzdy bildiremiz, — delingen mınıstrliktiń málimdemesinde.
Syrtqy ister mınıstrligi barlyq eldi deklaratsııaǵa «meılinshe tez» qol qoıyp, qabyldaýǵa shaqyrdy. Bul qadam Gaza sektorynda atysty birden toqtatýǵa, sondaı-aq 1967 jyly basyp alynǵan barlyq aýmaqta, sonyń ishinde Gaza sektorynda da palestındik mekemelerdiń saıası jáne quqyqtyq ókilettikterin júzege asyrýyna jol ashatyny atap ótildi.
Frantsııa, Ulybrıtanııa, Portýgalııa, Aýstralııa jáne Kanada — jýyrda Palestına memleketin moıyndap, «eki halyqqa — eki memleket» sheshimin qoldaǵan Batys elderiniń qataryna endi.
Palestınanyń Syrtqy ister mınıstrligi bul deklaratsııany Izraıldiń Gazadaǵy áskerı operatsııalary men palestın jerlerin anneksııalaý áreketterine qarsy turý úshin asa qajet qujat dep baǵalady. Bul áreketterge halyqaralyq qaýymdastyqtyń tarapynan syn kúsheıip kele jatqanyna qaramastan, olar jalǵasyp jatqany atap ótildi.
Budan buryn Frantsııa men Saýd Arabııasy Palestına memleketin moıyndatý úshin BUU-da sammıt ótkizýge shaqyrǵanyn jazǵan edik.
Sonymen qatar Túrkııa Prezıdenti Rejep Taıyp Erdoǵan BUU Bas Assambleıasynyń 80-sessııasynda palestına-ızraıl qaqtyǵysy máselesin kóterdi. Erdoǵan álemdi Palestınany moıyndaýǵa shaqyrdy.
Al Indonezııa Prezıdenti Prabovo Sýbıanto BUU Bas Assambleıasynda eliniń Gazaǵa bitimgershilik kúshterin jiberýge daıyn ekenin aıtty.
Búgin Memleket basshysy Qasym-Jomart Toqaev BUU Bas Assambleıasynyń 80-shi sessııasy aıasyndaǵy Jalpy debatta sóılegen sózinde Gazadaǵy gýmanıtarlyq daǵdarystyń aýqymy keńeıip bara jatqanyna alańdaýshylyq bildirdi.