Palestına: FATH 10 jyldan keıin alǵash ret jańa basshylyqty tańdaýǵa kiristi
ASTANA. KAZINFORM — Palestınalyq qozǵalys sońǵy on jylda alǵash ret jańa basshylyqty saılaý úshin jıyn ótkizip jatyr, dep habarlaıdy Kazinform agenttiginiń menshikti tilshisi.
Palestına prezıdenti Mahmud Abbastyń qatysýymen Palestınanyń ulttyq azattyq qozǵalysy — FATH-tyń segizinshi jalpy konferentsııasy beısenbi kúni bastaldy. Bul týraly palestınalyq WAFA agenttigi habarlady.
Sezd Iordan ózeniniń Batys jaǵalaýyndaǵy Ramalla qalasynda ornalasqan Palestına ákimshiliginiń shtab-páterinde ótip jatyr. Sonymen qatar qosymsha otyrystar Gaza sektorynda, Kaır men Beırýtte uıymdastyrylǵan. Uıymdastyrý komıtetiniń málimetinshe, is-sharaǵa qozǵalystyń shamamen 2580 múshesi qatysyp jatyr. Onyń ishinde 1600 delegat Ramallada, 400-i Gazada, 400-i Kaırde jáne 200-i Beırýtte otyr.
Forým úsh kúnge sozylady dep josparlanǵan. Delegattar FATH Ortalyq komıtetiniń 18 múshesin jáne qozǵalystyń Revolıýtsııalyq keńesiniń 80 múshesin saılaýy tıis.
Ramallada ótken FATH seziniń ashylýynda sóz sóılegen Mahmud Abbas Gazadaǵy soǵysty «qazirgi palestınalyq tarıhtaǵy buryn-sońdy bolmaǵan Nakba» dep atady.
Óz sózinde Abbas Gazadaǵy soǵys saldarynan 2500-den astam palestınalyq otbasynyń azamattyq tizilimnen tolyqtaı «joıylyp ketkenin» aıtty.
— Ákeler, uldar, atalar men nemereler túgeldeı joq boldy. Bul — genotsıd, — dedi Palestına kóshbasshysy.
Onyń aıtýynsha, Izraıl Gazadaǵy qalalar men bosqyndar lagerleriniń 85 paıyzdan astamyn, sonyń ishinde mektepterdi, aýrýhanalardy, meshitter men shirkeýlerdi qıratyp, «palestınalyqtardy yǵystyrýǵa» áreket jasaǵan.
Abbas sondaı-aq Batys jaǵalaý men Gaza sektoryn bólý múmkindigin taǵy da joqqa shyǵardy.
— Biz Batys jaǵalaý men Gazada ártúrli egemendi jáne egemendigi joq rejımderdiń bolýyna eshqashan jol bermeımiz, — dep málimdedi ol.
With the participation of President Mahmoud Abbas, the eighth general conference of the Palestinian National Liberation Movement (Fatah) officially opened on Thursday at the Ahmed Shuqairi Hall in the presidential headquarters in Ramallah. pic.twitter.com/3WmT3a1TP6
— WAFA News Agency - English (@WAFANewsEnglish) May 14, 2026
Palestına lıderi Palestına ulttyq ákimshiliginiń halyqaralyq uıymdarmen jáne shetel memleketterimen soǵysty toqtatý, gýmanıtarlyq kómek jetkizý jáne anklavty qalpyna keltirý jumystaryn bastaý baǵytynda jumysyn jalǵastyryp jatqanyn aıtty.
Sonymen qatar ol uzaq jyldar boıy keıinge shegerilip kelgen prezıdenttik jáne parlamenttik saılaý ótkizýge daıyn ekenin málimdedi. Alaıda naqty merzimin ataǵan joq.
Palestinian President Mahmoud Abbas said Fatah’s 8th General Conference marks a key moment to review the Palestinian path, strengthen national resilience, support reconstruction, and advance efforts toward ending the occupation.
— WAFA News Agency - English (@WAFANewsEnglish) May 14, 2026
More: https://t.co/WjuZc011QW pic.twitter.com/QLfEpHGc3w
FATH-tyń jańa basshylyǵyn saılaý
Bul sezd sońǵy on jylda alǵash ret ótip otyr jáne 90 jastaǵy Mahmud Abbastyń saıası bolashaǵyna qatysty suraqtar aıasynda qozǵalystyń keleshek basshylyǵyn aıqyndaıtyn mańyzdy jıyn sanalady.
Saıası sarapshylardyń pikirinshe, Ortalyq komıtettiń jańa quramy Abbastan keıingi yqtımal kezeńde mańyzdy ról atqarady. Sebebi ázirge onyń aıqyn murageri joq.
Abbastyń yqtımal muragerleri retinde Ortalyq komıtettiń bas hatshysy Djıbrıl Radjýb pen Palestına ulttyq ákimshiligi basshysynyń orynbasary Hýseın ash-Sheıhtiń esimderi atalyp júr.
Daýys berýge prezıdenttiń úlken uly ıAsır Abbas ta qatysyp jatyr. Bul jaıt keıbir palestınalyq sarapshylardyń synyna ushyrap, olar muny «bıliktiń áýlettik jolmen berilýi múmkin» degen belgi retinde baǵalady.
Sonymen qatar Palestınanyń birqatar yqpaldy saıasatkerleri sezge qatyspaı otyr. Atap aıtqanda, Palestınanyń burynǵy syrtqy ister mınıstri Naser ál-Kýdva jıynǵa boıkot jarııalap, qazirgi FATH basshylyǵyn «zańsyz» dep atady.
Sezge Mahmud Abbastyń yqtımal muragerleriniń biri ári Palestınadaǵy eń tanymal saıasatkerlerdiń biri sanalatyn Marvan Bargýtı de qatyspady. Ómir boıyna bas bostandyǵynan aıyrylǵan Bargýtı qazirgi ýaqytta Izraıl túrmesinde jazasyn ótep jatyr.
Іshki daǵdarys jáne bedeldiń tómendeýi
FATH Palestınany azat etý uıymyndaǵy eń iri fraktsııa jáne Palestına ulttyq ákimshiliginiń negizgi tiregi bolyp qala beredi. Alaıda qozǵalys ishki alaýyzdyqtar, jemqorlyqqa qatysty aıyptaýlar jáne Palestına memleketin qurý isindegi ilgerileýdiń joqtyǵy úshin barǵan saıyn kóp synǵa ushyrap otyr.
2006 jylǵy saılaýdan keıin FATH-tyń ustanymy edáýir álsiredi. Bul, eń aldymen, keıinnen Gaza sektoryn baqylaýǵa alǵan HAMAS qozǵalysynyń yqpalynyń kúsheıýimen baılanysty boldy.
Sarapshylardyń aıtýynsha, qazirgi sezd Palestına ulttyq qozǵalysy úshin eń kúrdeli kezeńderdiń birinde ótip jatyr. Oǵan Gaza sektoryndaǵy soǵys, Batys jaǵalaýdaǵy shıelenistiń kúsheıýi jáne FATH pen HAMAS arasyndaǵy jalǵasyp kele jatqan saıası bólinis sebep bolyp otyr.
Aıta keteıik, ótken aıda Iordan ózeniniń Batys jaǵalaýy men Gaza sektorynda mýnıtsıpaldyq saılaý ótti. Belgili bolǵandaı, Palestına ulttyq ákimshiliginiń (PUÁ) prezıdenti Mahmud Abbasty jaqtaýshylar kópshilik orynǵa ıe boldy.
