Palestına elshiligi: «Rafah» shekara beketi 20 qazanda qaıta ashylady
ASTANA. KAZINFORM – Mysyrdaǵy Palestına elshiliginiń málimetinshe, «Rafah» shekara beketi uzaq úzilisten keıin aldaǵy dúısenbide jumysyn qaıta bastaıdy, dep habarlaıdy DW.
Gaza sektory men Mysyr arasyndaǵy jalǵyz shekara ótkeli – «Rafah» baqylaý-ótkizý pýnkti dúısenbi, 20 qazanda ashylady. Bul týraly Mysyrdaǵy Palestına elshiligi senbi, 18 qazanda málimdedi, dep habarlaıdy Reuters. 2024 jyldyń mamyrynan bastap jabylǵan bul baqylaý pýnkti Mysyrda turatyn palestınalyqtarǵa Gaza sektoryna oralýǵa múmkindik beredi, delingen elshiliktiń habarlamasynda. Ótkel 2025 jyldyń aqpanynda ýaqytsha jáne shekteýli trafıkpen ashylǵan.
Sonymen birge Izraıl premer-mınıstri Bınıamın Netanıahý keńsesi Rafah ótkeli HAMAS lańkestik qozǵalysy Gazada kepilde ustap otyrǵan barlyq ızraıldiktiń máıitin bergennen keıin ǵana ashylady dep málimdedi.
Gaza sektoryna gýmanıtarlyq kómek jetkizý 10 qazanda kúshine engen Izraıl men HAMAS arasyndaǵy atysty toqtatý kelisiminiń bir bóligi bolyp sanalady. Osy ýaqytqa deıin gýmanıtarlyq kómek tıegen júk kólikteri bul aımaqqa «Kerem-Shalom» ótkeli arqyly kiretin. Alaıda BUU men Halyqaralyq Qyzyl Krest komıteti (HQKK) kómek jetkizý úshin barlyq shekara beketin ashýdy talap etti.
Gaza sektoryndaǵy atysty toqtatý týraly deklaratsııa
13 qazanda Mysyrdyń Sharm-esh-Sheıh qalasynda 20-dan astam álem kóshbasshylary qatysqan halyqaralyq «beıbitshilik sammıti» ótip, Gaza sektorynda atysty toqtatý týraly deklaratsııaǵa qol qoıyldy.
Deldal elder – Egıpet, Qatar, Túrkııa jáne AQSh Izraıl men Palestınanyń radıkaldy ıslamshyl HAMAS qozǵalysy arasyndaǵy kelisimdi resmı túrde bekitken qujatqa qol qoıdy. Tórt el soǵysty toqtatýǵa arnalǵan kelisimniń saqtalýyna kepildik berýge kelisetinin málimdedi.
AQSh prezıdenti Donald Tramptyń aıtýynsha, deklaratsııada 2023 jyldyń qazan aıynda bastalǵan qaqtyǵystyń ótkir kezeńin aıaqtaý jolyndaǵy odan ári qadamdar týraly «erejeler» belgilengen. Amerıkalyq kóshbasshy 13 qazandy «búkil álem men Taıaý Shyǵys úshin keremet kún» dep atady.
Esterińizge sala keteıik, 2023 jyldyń 7 qazany Taıaý Shyǵystaǵy qaqtyǵystyń órshýiniń bastapqy núktesi boldy. Sodyrlar Izraılge zymyranmen shabýyl jasap, onyń aýmaǵyna basyp kirip, shamamen 1200 adamdy óltirdi. Olar sondaı-aq 250-ge jýyq adamdy kepilge alyp, Gaza sektoryna alyp ketti. Kepilge alynǵandardyń keıbiri keıin aıyrbastaldy nemese bosatyldy, al basqalary qaıtys boldy.
Buǵan jaýap retinde Izraıl HAMAS-qa soǵys jarııalady. HAMAS baqylaýyndaǵy Densaýlyq saqtaý mınıstrliginiń málimeti boıynsha, jerústi shabýyly men Gaza sektoryn bombalaý kezinde 67 000-nan astam palestınalyq qaza taýyp, 169 000-nan astamy jaralanǵan.
Aıta keteıik, alǵash ret júzdegen Gaza turǵyny qıraǵan meshitte juma namaz oqydy.
Gaza sektoryn qalpyna keltirýge ondaǵan jyl qajet bolýy múmkin.
Izraıl Gaza sektoryna gýmanıtarlyq kómek kólemin arttyrýǵa ruqsat berdi.