Palestına Dúnıejúzilik densaýlyq saqtaý uıymynda týyn alǵash ret kótermek

ASTANA. KAZINFORM – Dúnıejúzilik densaýlyq saqtaý uıymyndaǵy (DDSU) Palestına delegatsııasy dúısenbi kúni osy BUU qurylymynda óz týyn kóterý quqyǵyn aldy, dep habarlaıdy AZERTADJ.

Agenttiktiń málimetinshe, Palestına delegatsııasy bul oqıǵany halyqaralyq qaýymdastyq tarapynan moıyndalýǵa baǵyttalǵan shaǵyn jeńis retinde baǵalady.

Bul bastamany Qytaı, Pákistan, Saýd Arabııasy jáne basqa da elder kóterdi. Jenevada ótken Dúnıejúzilik densaýlyq saqtaý uıymynyń jyl saıynǵy jıynynda usynysty 95 memleket qoldady. Al Chehııa, Izraıl, Majarstan jáne Germanııa qarsy daýys berdi. 27 el daýys berýden qalys qaldy. Izraıldiń jaqyn odaqtasy — AQSh bul daýys berýge qatysqan joq. Sonymen qatar, Vashıngton jaqyn arada DDSU-dan shyǵýǵa daıyndalyp jatqany habarlandy.

Aıta keteıik, Palestına avtonomııasynyń BUU-daǵy mártebesi — baqylaýshy. Ótken jyldyń qyrkúıeginde Palestına ókili alǵash ret BUU Bas Assambleıasynyń otyrysyna qatysty, biraq daýys berý quqyǵynsyz.

Osyǵan deıin Malta maýsym aıynda Palestınanyń táýelsizdigin moıyndaıtyny belgili boldy.