Palestına BUU Bas Assambleıasynyń «eki memleket» sheshimin quptady

ASTANA. KAZINFORM — Palestına BUU Bas Assambleıasynyń Nıý-Iork deklaratsııasyn qabyldaǵanyn jáne palestınalyq máseleni beıbit jolmen retteý men «eki memleket» prıntsıpin júzege asyrýǵa qoldaý bildirgenin quptady. Bul týraly Palestına vıtse-prezıdenti Hýseın ash-Sheıh áleýmettik jelidegi jazbasynda málimdedi, dep habarlaıdy Anadolu.

«Bul sheshim halqymyzdyń quqyqtaryna halyqaralyq qoldaýdy bildiredi jáne 1967 jylǵy shekaralar aıasynda astanasy Shyǵys Ierýsalım bolatyn táýelsiz memleket qurýǵa jáne okkýpatsııany toqtatýǵa mańyzdy qadam bolyp tabylady», — dedi ol.

Ash-Sheıhtiń aıtýynsha, Palestına memleketiniń halyqaralyq deńgeıde keńinen moıyndalýy palestınalyq halyqtyń ózin-ózi bıleý quqyǵyn nyǵaıtýdyń, «eki memleket» sheshimin saqtaýdyń, sondaı-aq óńirlik jáne halyqaralyq qaýipsizdik pen turaqtylyqty qamtamasyz etýdiń negizgi alǵysharty bolyp otyr.

Palestına Syrtqy ister mınıstrligi de bul qujatty qoldap, ony Bas Assambleıanyń 80-sessııasynda qabyldanǵan alǵashqy sheshim dep atady. Vedomstvo qarar jobasyn engizgen, qoldap, daýys bergen barlyq memleketterdiń rólin joǵary baǵalap, Nıý-Iork deklaratsııasynyń BUU-nyń resmı qujatyna aınalǵanyn atap ótti.

Sonymen birge palestınalyq tarap halyqaralyq qaýymdastyqty Izraılge qysym kórsetýge shaqyrdy. Mınıstrlik Izraıldi shabýyldardy toqtatýǵa, atysty doǵarýǵa, Gazada ashtyqty qarý retinde paıdalanýdan bas tartýǵa, májbúrli qonys aýdarýlardy doǵarýǵa jáne barlyq tutqyndar men ustalǵandardy bosatýǵa mindetteýdi talap etti.

Eske salsaq, buǵan deıin Bas Assambleıa kópshilik daýyspen — 142 el «qoldap», 10 el (onyń ishinde AQSh pen Izraıl) «qarsy» bolyp, 12 el qalys qalyp, Frantsııa men Saýd Arabııasy usynǵan qarardy qabyldaǵan edi. Qujatta HAMAS qozǵalysynyń qatysýynsyz Palestına memleketin moıyndaý jáne Izraıl-Palestına qaqtyǵysyn beıbit jolmen retteý kózdelgen.

Aıta keteıik, Belgııa BUU Bas Assambleıasynda Palestınany resmı túrde moıyndaıdy