Palestına bıligi Qatardyń «Ál-Jazıra» telearnasynyń habar taratýyn toqtatty

ASTANA. KAZINFORM — Palestına bıligi basyp alynǵan Iordan ózeniniń batys jaǵalaýyndaǵy qatarlyq «Ál-Jazıra» telearnasynyń habar taratýy men qyzmetin toqtatty, dep habarlaıdy CNN.

Telearna «alańdaýshylyq týdyratyn jáne Palestınanyń ishki isterine aralasatyn qozdyrǵysh materıaldardy» jáne «jańa habarlardy» taratqany úshin aıyptalǵan. Bul týraly sársenbi kúni Palestınanyń Wafa resmı aqparat agenttigi habarlady.

Sondaı-aq, «Ál-Jazıranyń» quqyqtyq mártebesi túzetilmeıinshe, arnanyń qyzmeti qalpyna keltirilmeıtini atalyp ótti.

Óz kezeginde arna bul sheshimdi aıyptap, ony «basyp alynǵan aýmaqtardaǵy, ásirese Djenın qalasy men onda ornalasqan lagerdegi oqıǵalar týraly shyndyqty jasyrý áreketi» dep atady.

— Jabý týraly sheshim Palestına bıligi demeýshilik etetin uıymdardyń bizdiń jýrnalısterge qarsy arandatý jáne qorqytý naýqanynan keıin qabyldandy, — delingen Al Jazeera málimdemesinde.

Telearna bılikten óz sheshimin ózgertýdi jáne túsirý tobyna eldegi oqıǵalardy kórsetýdi jalǵastyrýǵa ruqsat berýdi talap etti.

Aıta keteıik, buǵan deıin «Ál-Jazıra» AQSh-ta habar taratýdy toqtatqany málim boldy.