Palestına Astanadaǵy IYU sammıtine joǵary deńgeıde qatysatyndyǵyn qýattady

ASTANA. QazAqparat - 7-8 shilde kúnderi Qazaqstan Respýblıkasy Prezıdentiniń Islam yntymaqtastyq uıymy jónindegi Arnaıy ókili, Syrtqy ister mınıstriniń orynbasary Aqylbek Kamaldınov Taıaý Shyǵys aımaǵyna jasaǵan týrnesi sheńberinde Ramalla qalasyna sapar shekti. Onyń barysynda Palestına basshylyǵymen ekijaqty kelissózder jáne Qazaqstan-Palestına arasyndaǵy saıası konsýltatsııalar ótti, dep habarlaıdy QazAqparat QR SІM-niń baspasóz qyzmetine silteme jasap.

Qazaqstan dıplomaty Palestına Premer-mınıstri Ramı Hamdallamen kezdesýinde Qazaqstan Prezıdenti Nursultan Nazarbaevtyń Palestına Prezıdenti Mahmýd Abbasqa arnalǵan 2017 jylǵy 10-11 qyrkúıekte Astana qalasynda ótetin Islam yntymaqtastyq uıymynyń Ǵylym jáne tehnologııalar jónindegi alǵashqy sammıtine qatysý jónindegi shaqyrý hatyn tabystady. Palestına Premer-mınıstri óz kezeginde M. Abbastyń atynan QR Prezıdenti N. Nazarbaevtyń bul shaqyrý hatyna alǵys bildirdi. Palestına tarapy Astanada ótetin IYU sammıtine eń joǵary deńgeıde qatysatyndyǵyn qýattady.

A. Kamaldınov óz kezeginde atalǵan sammıt IYU múshe-elder arasynda ǵylym jáne ınovatsııa salasyndaǵy baılanystardyń nyǵaıýyna, sondaı-aq ıslam álemindegi ekonomıkalyq damý salasyndaǵy jobalardyń júzege asýyna jáne halyqtyń áleýmettik jaǵdaıyn jaqsartý maqsatynda ǵylym men tehnologııa róliniń kúsheıýine jańa serpin beretinin jetkizdi.

Suhbat barysynda R.Hamdalla QR Memleket basshysynyń bitimgerlik saıasatyn joǵary baǵalady jáne Prezıdent N.Nazarbaevtyń ǵalamdyq jáne aımaqtyq shıelenisterdi, onyń ishinde Sırııa daǵdarysyn, Palestına máselesin jáne t.b. problemalardy sheshýge baǵyttalǵan úlesin aıryqsha atap ótti. Palestına tarapy elimizdiń Palestınaǵa túrli halyqaralyq sahnalarda qoldaý kórsetkenine alǵysyn bildirip, halyqaralyq jáne aımaqtyq uıymdar aıasynda yntymaqtastyq odan ári jemisti jalǵasatynyna  úmit artty.

Sol kúni QR Syrtqy ister mınıstriniń orynbasary ekijaqty qarym-qatynastar tarıhynda alǵash ret Palestına Syrtqy ister mınıstriniń orynbasary Mazen Shamııamen saıası konsýltatsııalar ótkizdi. Іs-shara barysynda saıası, ekonomıkalyq, ınvestıtsııalyq jáne áleýmettik-mádenı salalardaǵy ekijaqty yntymaqtastyq máselelerin, sondaı-aq halyqaralyq jáne aımaqtyq uıymdar, olardyń ishinde IYU, Eýrazııa ekonomıkalyq odaǵy jáne t.b. uıymdardyń aıasynda eki el arasyndaǵy ózara yqpaldastyqtyń keleshegin talqylady.

Saıası konsýltatsııalar sheńberinde taraptar halyqaralyq jáne óńirlik kún tártibindegi ózekti máseleler, sonyń ishinde ishinde Palestına-Izraıl ahýalyn beıbit retteý  protsesi, Sırııa jáne Iraktaǵy jaǵdaı jáne ózge taqyryptar boıynsha pikir almasty.