Palestına AQSh-tyń Gazadaǵy halyqaralyq kúshter týraly qarar jobasyn synǵa aldy
ASTANA.KAZINFORM - Bul málimdeme BUU Qaýipsizdik Keńesinde AQSh-tyń Gazaǵa halyqaralyq kúshterdi ornalastyrý bastamasy boıynsha daýys berý qarsańynda jasaldy, dep habarlaıdy Kazinform menshikti tilshisi.
HAMAS jáne basqa da palestınalyq fraktsııalar BUU Qaýipsizdik Keńesinde daýysqa salynyp jatqan jáne Gazany demılıtarızatsııalaý men shekara qaýipsizdigin qamtamasyz etý úshin Halyqaralyq turaqtandyrý kúshterin (HTK) qurýdy talap etetin AQSh-tyń qararyn synǵa aldy.
Jarııalanǵan jazbada fraktsııalar qujatty «qaýipti» dep atap, ony Gazaǵa halyqaralyq qamqorlyq ornatý, Palestınany basqarýdy jáne jergilikti ınstıtýttardyń rólin shekteý áreketi retinde baǵalady.
Málimdemede usynylǵan basqarý qurylymy negizgi ókilettikterdi halyqaralyq organǵa tıimdi túrde beretini, fraktsııalardyń pikirinshe, bul palestınalyqtardyń táýelsiz sheshim qabyldaý múmkindigin álsiretetini aıtyldy.
- Qarý-jaraqpen baılanysty kez kelgen másele ulttyq sheńberde sheshilýi, okkýpatsııanyń aıaqtalýyna jáne ózin-ózi bıleý quqyǵyn júzege asyrýǵa kepildik beretin protsesspen baılanystyrylýy kerek, - delingen málimdemede.
Qujatta Izraılmen úılestire otyryp áreket ete alatyn jáne osylaısha onyń múddesine tıimdi qyzmet ete alatyn halyqaralyq kúshter usynǵan modeli synǵa alynady.
Gaza sektorynda kez kelgen sheteldik áskerı aralasý, sonyń ishinde baza qurýǵa nemese Palestınanyń kelisiminsiz áskerlerdi engizýge qarsylyq bildiriledi, sebebi bul egemendikti buzý bolyp sanalady. Fraktsııalar Izraıl áreketin baqylaý jáne beıbit turǵyndarǵa tóngen qaýip úshin jaýapkershilikti arttyrý tetikterin talap etti.
Alaıda, jeksenbi kúni HAMAS ókili Hazem Kassem amerıkalyq joba anklavtaǵy turaqtandyrýǵa yqpal etpeıtinin jáne palestınalyqtardyń quqyqtaryn qorǵaýdy qamtamasyz etpeıtinin málimdedi.
- Biz okkýpatsııanyń Gazaǵa, Batys jaǵalaýǵa nemese Ierýsalımge qaraı jyljýyna jol bermeıtin jáne halqymyzdyń ózin-ózi bıleý quqyǵyn qorǵaıtyn qarar qabyldaǵymyz keledi, - dedi ol SAFA jańalyqtar agenttigi taratqan túsiniktemede.
Dúısenbi kúni keshke Nıý-Iorktegi BUU shtab-páterinde atysty toqtatý josparyn jáne Gaza sektoryn baqylaýdy Halyqaralyq turaqtandyrý kúshteri men Palestına ákimshiligine «Beıbitshilik keńesiniń» baqylaýymen berýdi qoldaıtyn qarar jobasy boıynsha daýys berý josparlanǵan.
Qujatta aýmaqty demılıtarızatsııalaý jáne halyqaralyq kontıngentpen birge jumys isteý úshin Palestına polıtsııasyn oqytý talap etiledi.
Aıta keteıik, Palestınalyqty zorlaý áreketteriniń vıdeosyn jarııalaǵan Izraıl tilshisi qýdalandy.