Paleontologtar tas júrek taýyp aldy
ASTANA. QazAqparat - Halyqaralyq ǵalymdar toby júregimen qosa tasqa aınalyp saqtalyp qalǵan balyqtyń qańqasyn taýyp alyp, ony zerttep shyqty. Buǵan deıin tasqa aınalǵan tirshilik ıesiniń eshqaısysynyń ishki múshesi tabylmaǵan bolatyn. Zertteý qorytyndysy eLife jýrnalynda jarııalandy.
Joıylyp ketken Rhacolepis buccalis túrine jatatyn jebe qabyqty balyqtyń qańqasy bor kezeńine qatysty tasqa aınalǵan qańqalar kóp kezdesetin Brazılııadaǵy Santanada tabyldy. Zertteýshiler qańqanyń jasy shamamen 116-119 mıllıon jyl dep eseptep otyr.
Brazılııa, Frantsııa men Shvetsııa ǵalymdary tasqa aınalǵan balyqtyń denesin mıkrotomografııanyń sınhrotrondyq rentgendeý tásilimen zerttedi. Olar jaqsy saqtalǵan júrekti tapty, onyń arterıaldyq konýsy - ıaǵnı qozǵalatyn bóligi aıqyn kórinedi. Onda bes qaqpaqshasy bar ekendigi belgili boldy.
