Palaý ortalyǵyndaǵy órtke qatysty sottyń qashan bastalatyny belgili boldy
ASTANA. KAZINFORM — «Tsentr plova Loft» kafesinde bolǵan jáne 12 adamnyń ómirin qıǵan qaıǵyly órtke qatysty qylmystyq istiń qashan qaralatyny belgili boldy.
Aqmola oblystyq sotynyń baspasóz qyzmeti is boıynsha alǵashqy sot otyrysynyń 2026 jyldyń 25 maýsymyna Býrabaı aýdandyq sotynda belgilengenin habarlady.
Eske sala ketsek, aqpannyń 26-synan 27-sine qaraǵan túni Şýchınsk qalasyndaǵy kafelerdiń birinde gaz ballony jarylǵan bolatyn. Alǵashynda alty adamnyń qaza tapqany aıtylǵan edi. Keıinnen olardyń sany toǵyzǵa jetti. Al ýaqyt óte kele jansaqtaý bóliminde jatqan taǵy eki adam kóz jumdy.
Sonymen qatar Şýchınskidegi jarylys pen órtten zardap shekken bes adamnyń Astanaǵa jóneltilgeni týraly habarlanǵan bolatyn.
Olardyń tórteýi Astana qalasyndaǵy Ulttyq shuǵyl medıtsınany úılestirý ortalyǵyna ushaqpen, al taǵy bireýi jedel járdem kóligimen jetkizildi.
Keıinnen bul aýrýhanada taǵy bir zardap shekken adam kóz jumdy. Osylaısha «Palaý ortalyǵy» dámhanasyndaǵy órtten qaza tapqandardyń jalpy sany 12 adamǵa jetti.
Osy jarylysqa baılanysty qylmystyq is qozǵaldy.
Kóp uzamaı «Palaý ortalyǵy» dámhanasynyń ıesi ustalǵany belgili boldy. 4 naýryzda ol eki aıǵa qamaýǵa alyndy.
Budan keıin dámhana ıesiniń qamaýda ustaý merzimi uzartylǵany belgili boldy.
Sońǵy málimetter boıynsha «Palaý ortalyǵy» isine qatysty sotqa deıingi tergep-tekserý amaldary aıaqtalyp, materıaldar sotqa joldanǵan edi.
