«Palaý ortalyǵy» jarylysy: jeti jyldyq jazaǵa jábirlenýshilerdiń týystary nege narazy
ASTANA. KAZINFORM — Şýchınsk qalasyndaǵy «Palaý ortalyǵy» kafesinde bolǵan jarylys isi boıynsha úsh sottalýshyǵa úkim shyqqannan keıin qaza tapqandar men zardap shekkenderdiń týystary sot sheshimine qatysty pikir bildirdi, dep habarlaıdy Kazinform tilshisi.
Jarylys kezinde qaza bolǵan Natalıa Nıkıtınanyń ápkesi Elena Shabanovıchtiń aıtýynsha, marqum kafe tazalaýshysy bolyp jumys istegen. Bıyl ol 48 jasqa tolar edi. Natalıa jarylys saldarynan oqıǵa ornynda qaza tapqan.
— Men ony aýrýhanadan emes, máıithanadan taptym. Búgin sottyń sońǵy otyrysy ótip, úkim shyqty. Sottalýshylar arasynda kinásiz adam joq. Olardyń árqaısysynyń óz kinási bar. Bul qaıǵyly jaǵdaıǵa ákelgen oqıǵalar tizbegi sııaqty. Olardyń zań buzýshylyqtary 12 adamnyń ólimine sebep boldy, taǵy 11 adam aman qalǵanymen, qazir emdelip jatyr. Olarǵa densaýlyq, kúsh pen sabyr tileımin. Men sot sheshimimen kelisemin, árqaısysynyń kinási bar, olardyń árqaısysy óz mindetterin buzǵany tergeý barysynda dáleldendi, — dedi Elena Shabanovıch.
Alaıda jábirlenýshilerdiń barlyǵy bul pikirmen kelise bermeıdi. Keıbiri jekelegen sottalýshylarǵa taǵaıyndalǵan jaza tym qatań dep sanaıdy.
«Palaý ortalyǵynda» ákimshi bolyp jumys istegen Dınara Tsýrova jarylystan qaza tapqan. Onyń jubaıy Musa Tsýrov is boıynsha negizgi sottalýshyǵa taǵaıyndalǵan jeti jyldyq jazany tym aýyr dep esepteıdi.
— Alǵashqy kúnnen bastap eshkimdi nazardan tys qaldyrmaǵan adam nege jeti jyl aldy? Dombrovskıı (Vıktor Dombrovskıı — gaz jetkizýshi — red.) gaz ballonyn Şýchınskidegi kez kelgen nysanǵa kirgize alatyn. Balabaqshaǵa da, myna qalalyq sotqa da, prokýratýraǵa da apara alatyn. Al qazir sot oblys ákimine gaz salasyndaǵy tártipti retteý týraly jeke qaýly joldady. Ol úshin meniń áıelimniń qaza tabýy kerek boldy ma? — dep ashyndy Musa Tsýrov.
Sottalǵandardyń biri Hasan Mýshajıevtiń anasy Nýrıdat Mýshajıeva da ulyna taǵaıyndalǵan jazany tym qatań dep sanaıdy.
— Ol qaýipsizdik talaptaryn saqtamady deıdi. Onda bul kafe nege buǵan deıin jabylmady? Ol onda eshteńemen aınalysqan joq, tek qarjylandyrdy. Menińshe, ulyma jeti jyl tym kóp. Onyń úlken balasy toǵyz jasta, kishisi nebári 11 aılyq, — dedi ol.
Áıel ulynyń óz kinásin moıyndaǵanyna da tańǵalǵanyn aıtty.
Jarylystan zardap shekken ıÝlııa Kıselevanyń ákesi Alekseı Kıselev bolǵan jaǵdaıǵa gaz jetkizý jáne satý isimen aınalysqan adamdardyń jaýapkershiligi kóbirek dep esepteıdi.
— Ballondy Dombrovskıı ákeldi, ony shamadan tys toltyrdy. Ol jerde tarazy joq ekenin anyq kórdi, munyń aldyn alýǵa bolatyn edi. Segizbaev ta ballondaǵy gazdy satýǵa ruqsaty bolmasa da, tarazysy joq ekenine qaramastan satqan. Negizgi kiná solarda dep oılaımyn. Al jarylys bolǵan sátte Hasannyń kinási joq. Órt qaýipsizdigi talaptaryn buzǵany úshin jeti jyl — tym kóp, — dedi Alekseı Kıselev.
Eske sala keteıik, búgin «Palaý ortalyǵy» kafesindegi jarylysqa qatysty is boıynsha sot úkimi jarııalandy.
Sot sonymen qatar qoǵamdyq tamaqtaný nysandaryndaǵy órt jáne basqa da qaýipsizdik talaptaryn qamtamasyz etý salasynda profılaktıkalyq jumysty uıymdastyrý men vedomstvoaralyq ózara is-qımylda kemshilikter anyqtalǵanyna baılanysty Aqmola oblysynyń ákimine qatysty jeke qaýly shyǵardy.
